འབྲོག་ཕྲུག
རྩོམ་པ་པོ། གཟུངས་བྷ།
འབྲོག་ཕྲུག
རྩོམ་པ་པོ། གཟུངས་བྷ། རྨ་ལྷོ།
ངས་ནི་ཨ་མ་མ་གཏོགས་ངོ་མི་ཤེས་ལ་གོོ་ཁ་མ་གཏོགས་ས་མི་ཤེས་ཀྱང་སྲིད།ང་ནི་ས་ཁུག་ལོག་ནང་གི་མྱི་སྐོར་ལོག་ཞིག་ཡིན་ཀྱང་སྲིད།གང་ལྟར་སྐད་ཆའི་སྟོབས་ཞེས་པའི་མཁས་པའི་ལྷན་ཚོགས་སུ་མཁས་པ་ཟེར་ན་འདི་ལོས་ཡིན་སྙམ་ཆེད་ཅིག་ནི་ངས་ཀྱང་ཤེས་མ་སོང་ལ་མཐོང་ཡང་མ་སོང་།སྐད་འཕྲིན་གྱི་ཚོམས་ཤིག་ལ་མཁས་པའི་ལྷན་ཚོགས་ཞེས་བཏགས་ཀྱང་མ་བཏགས་ཀྱང་ནང་སྙིང་གཙོ་བོ་མ་རེད་དམ།ང་མཁས་ངས་ཤེས་ཀྱི་སྦྱོར་བ་ཇི་ལྟར་སྤེལ་ཡང་དོན་སྙིང་གཙོ་བོ་མ་རེད་དམ།ང་འབྲོག་ཕྲུག་གླེན་རུང་རང་སྐད་བཤད་ཀྱིན་ཡོད་ལ་རང་སྲོལ་བརྗེད་ཀྱིན་མེད།ཁྱེད་མཁས་པ་རྣམས་ཀྱི་པར་འགོའི་པར་ལ་བལྟས་ན་གཅིག་ལས་གཅིག་གི་མིག་ཤེལ་ལ་འོད་མདངས་བཀྲ་ཞིང་ཏུའུ་ཚད་ཀྱང་ལོས་མཐོ་སྙམ།ཁྱེད་མཁས་པ་རྣམས་ཀྱི་བཤད་པའི་སྐད་ཆ་ལ་ཉན་ན་གཅིག་ལས་གཅིག་གི་ཕུགས་བསམ་ལ་རིན་ཐང་ལྡན་ཞིང་ལག་ལེན་ཡང་ལོས་ཡོད་སྙམ།འོན་ཀྱང་དོན་དམ་དུ་ཁྱེད་ཅག་གིས་ཅི་ཞིག་བྱས་སོང་ལ་ཅི་ཞིག་བསྒྲུབས་སོང་།ངས་བསམ་ན་ཁྱེད་ཅག་ནི་ཁ་སྟོང་ནང་ནས་ཚིག་སྟོང་བཤད་ནས་སྡོད་མཁན་རེ་རེ་ལས་ཅི་ཡང་མ་རེད།
འབྲོག་དྲི་དྲོ་ཞིང་འབྲོག་གཤིས་མ་དོར་བའི་འབྲོག་ཕྲུག་སྐར་མ་བདུད་འདུལ་གྱིས་གོང་དུ་བཤད་པའི་སྐད་ཆ་དེེ་ལ་ཉན་མ་ཐག་ཏུ་ཚིག་རྩུབ་ཀྱི་ཆ་ཅུང་ཙམ་ཞིག་མངོན་འདུག་ཀྱང་།བསམ་བློ་ཞིབ་ཏུ་བཏང་ན་ཁྱོད་ཀྱང་ཁོའི་བཤད་པའི་སྐད་ཆ་དེ་ལ་བདེན་སྣང་འཆར་མཁན་ཞིག་ཡིན་ཡང་སྲིད།རྒྱུ་མཚན་མཁས་པའི་ཁེངས་སྐྱུང་དང་བླུན་པོའི་ཨུ་ཚུགས་ཞེས་བཤད་སྲོལ་ཞིག་ཡོད་པ་ལྟར།བླུན་པོའི་ཨུ་ཚུགས་ཇི་ལྟར་བྱས་ཀྱང་དེ་ལ་ཁ་ཁོག་གཉིས་ཀ་ཐོ་ཐུག་པའི་དྲང་གཤིས་ཤིག་དང་།མཁས་པའི་ཇི་ལྟར་ཁེངས་སྐྱུང་བྱས་ཀྱང་དེ་ལ་ཕྱི་ནང་གཉིས་ཀ་ཁ་གྱེས་པའི་ཚུལ་འཆོས་ཤིག་ཡོད་སྣང་འཆར་བས།ཁྱོད་ཀྱང་འབྲོག་ཕྲུག་སྐར་མ་བདུད་འདུལ་གྱི་དྲང་མོའི་མི་གཤིས་ལས་བལྟམས་པའི་བདེན་པའི་སྐད་ཆ་དེ་ལ་བདེན་སྣང་འཆར་བ་དང་སྦྲགས།ཚུལ་འཆོས་ཀྱི་ཕྱི་ཤུན་མནབས་པའི་མཁས་པའི་ཁྱུ་ཞིག་ལ་ཁོ་ཐག་གཏིང་ནས་ཆད་ཀྱང་སྲིད།གང་ལྟར་བསམ་བློ་བཞི་གསུམ་བཅུ་གཉིས་དང་བློ་རྩེ་ཉི་ཤུ་རྩ་ལྔ་བཀོལ་ལ་ཞིབ་འདང་ཞིག་རྒྱོབས་དང་།འབྲོག་ཕྲུག་ཕལ་བ་ཞིག་གི་ཁ་ན་ཉན་རྒྱུ་ལེན་རྒྱུ་དང་མཁས་པའི་ལྷན་ཚོགས་ཤིག་གི་གླིང་ན་སྤང་རྒྱུ་དོར་རྒྱུ་མང་ན་ཐང་།
ཐེེངས་ཤིག་སྐར་མ་བདུད་འདུལ་གྱིས་གོས་ཆེན་ཐང་ལ་བཏང་འདྲའི་རྩྭ་ཐང་ཞིག་ཏུ་སྐར་ཚོགས་ས་ལ་འཐོར་འདྲའི་ལུག་ཁྱུ་ཞིག་འཚོ་ཞོར་སྐྱིད་པའི་སྣ་གླུ་ཐན་ཐུན་རེ་བླངས་ནས་འདུག་སྐབས།ཀླུ་གཞུང་སྡེ་བ་ལ་མཚོན་ན་ཤེས་ཡོན་པའི་སྡེ་རུ་བགྲང་དགོས་པའི་ཚེ་རྡོར་གྱིས་རླངས་འཁོར་ཞིག་བསྐོར་ནས་ཁོའི་གམ་ལ་ཐོན།ཚེ་རྡོར་གྱིས་རླངས་འཁོར་ལས་བབས་མ་ཐག་བཅོོས་མའི་འཛུམ་མདངས་ཤིག་སྟོན་ཞོར་བཤད་རྒྱུར།སྐར་མ་བདུད་འདུལ་བཟས་ཡ།ཁྱོད་ཀྱིས་མཁས་པའི་ལྷན་ཚོགས་སུ་སྤོ་ཐོག་གི་སྐད་ཆ་ཉ་ཉོག་ལུང་བ་གང་བཤད་རྗེས་ཚོམས་ལས་ཕྱིར་འབུད་དོན་ཅི།ཁྱོད་ཚོམས་ལས་མ་བུད་ན་འགྲིག་ཡོད།མཁས་པ་མང་བོ་ཞིག་གིས་ཅིས་ཀྱང་ཁྱོད་ནི་མི་དྲང་མོ་ཞིག་རེད་ཅེས་བསྔགས་བརྗོད་བྱེད་ཀྱིན་འདུག་ཅེས་མར་སྤང་ཁུགས་སུ་ཙོག་གྲབས་བྱེད་སྐབས།སྐར་མ་བདུད་འདུལ་གྱིས་ཧིན་ཧིན་ཞེས་ཁོང་དགོད་ཅིག་བྱེད་ཞོར་ཕྱིར་འདི་ལྟར་ལན་བཏབ་པ་སྟེ།ང་ལ་མཚོན་ན་མཁས་པ་ཞིག་གི་བསྔགས་བརྗོད་ལས་མ་མོ་ཞིག་གི་འཕེལ་ཁ་ལ་རིན་ཐང་ལྡན།དེ་ཚོས་བསྟོད་བསྔགས་བྱས་དང་མ་བྱས་ང་ལ་དོ་སྣང་ཅི་ཡང་མེད་ཅེས་སླར་ཡང་ཧིན་ཧིན་ཞེས་ཁོང་དགོད་ཅིག་བྱས་པ་ན།ཚེ་རྡོར་དེ་མ་ཐག་ད་སོ་མ་ཙོག་མ་ཐག་པའི་སྤང་ཁུགས་དེ་ནས་ཡར་ལ་ལངས་ཏེ་རླངས་འཁོར་གྱི་ཕྱོགས་སུ་བསྐྱོད་ཅིང་།འདི་གའི་སྤང་ཁུགས་ནས་ཕ་གིའི་གཞུང་ལམ་དེའི་སྟེང་དུ་རླངས་འཁོར་གྱི་ཁ་ལོ་གཡས་བསྐོར་གཡོན་སྐྱོགས་ཀྱིས་རླུང་འཚུབ་ལྡང་བ་ལྟར་བསྐོར་ནས་བུད་སོང་།
ཚེ་རྡོར་སོང་ཤུལ་དུ་སྐར་མ་བདུད་འདུལ་གྱིས་འདི་ལྟར་ཁེར་དགོད་ཅིག་བྱས་པ་སྟེ།རིག་གནས་ཅུང་ཙམ་ཡོད་ཟེར་བའི་མི་འདི་ཚོའི་ཁོག་རྒྱ་ཅི་འདྲའི་དོག་པ་ལ།སྐད་ཆ་ཚིག་འགའ་ཡང་ཁོག་ཏུ་ཆུད་ཀྱིན་མི་འདུག་པར་བལྟས་ན།གཞན་པའི་དོན་དག་རླབས་ཆེན་ཞིག་བསྒྲུབ་ཀྱིན་ཡོད་ཟེར་ན་སུ་ཞིག་གི་རྣར་འགྲོའམ།དེ་ལས་རང་གི་སྒོ་ཟོག་དྲིན་ཆེན་འདི་ཚོ་འཚོ་སྐྱོང་བྱེད་ཞོར་རང་ཁ་རང་གིས་གསོས་ན་དེ་ཡིས་དགའ་ས་རེད་ཅེས་ཚུར་ཁའི་ཉིན་ལུང་ཞིག་ཏུ་སྔོ་རྩྭ་ཆེམ་ཆེམ་དུ་ཟ་བཞིན་པའི་ལུག་ཁྱུ་དེ་ལ་ཐེངས་གཅིག་བལྟས་ཤིང་གདོང་ལ་ཡིད་ཚིམ་པའི་ཚིམ་སྣང་ཞིག་མངོན་ནས་འདུག་གོ
ང་རང་སྐར་མ་བདུད་འདུལ་གྱི་བསམ་ཚུལ་འདི་ལ་བརྒྱ་ཆའི་དགུ་བཅུ་གོ་བདུན་གྱིས་མོས་མཐུན་ཡོད་ལ་བརྒྱ་ཆའི་གསུམ་གྱིས་མོས་མཐུན་མེད།རྒྱུ་མཚན་ག་རེེེེ་རེད་ཟེེར་ན་འདི་ལྟ་སྟེ།དེེེང་གི་ཆར་མཁས་པ་ཡིན་ཟེར་མཁན་མང་བོ་ཞིག་དོན་གྱིས་མཁས་པ་མིན་ལ།མཁས་མིང་ཙམ་འཛིན་པའི་མཁས་པ་མང་ཆེ་བ་ཞིག་གིས་ཀྱང་བསྐྱར་དཔར་འཕྲུལ་ཆས་རེ་དང་འདྲ་བར་གཞན་ལ་ལད་ཟློས་དང་གཞན་གྱི་ཟེར་སྒྲོས་ཙམ་བསྐྱར་ཟློས་བྱས་ནས་འདུག་པ་ལས།རང་གི་ཁ་ཕྱོགས་ལངས་ཕྱོགས་མེད་ལ་རང་གི་གསར་རྙེད་ཀྱི་ལེགས་བཤད་གཏན་ཚིགས་དེ་བས་ཀྱང་མེད།ཡིན་ན་ཡང་སྐར་མ་བདུད་འདུལ་གྱིས་མཁས་པ་འདི་ཚོ་ཞེས་མཁས་པ་ཡོད་ཚད་ཧྲིལ་གྱིས་འདོར་བའི་ཟུར་བལྟས་ལེབ་མཐོང་བྱེད་པའི་རྣམ་འགྱུར་དེ་ལ་དེ་འདྲ་མི་འཐད།མཁས་པ་ཉུང་ཤས་ཤིག་ནི་མིང་དོན་གཉིས་མཚུངས་ཀྱི་མཁས་པ་ཡིན་པས་མི་ཚད།རང་གི་ཚུགས་ཐུབ་ཀྱི་ཁ་ཕྱོགས་ལངས་ཕྱོགས་དང་རང་གིས་གསར་དུ་རྙེད་པའི་ལེགས་བཤད་གཏན་ཚིགས་ཀྱི་གཞུང་ལུགས་གདའ་བས་ན།ང་ཚོས་སྔར་བཞིན་འཇིག་རྟེན་གྱི་མིག་རེ་རེ་དང་འདྲ་བའི་མཁས་པ་དེ་ཚོ་ལ་བརྩི་བཀུར་དང་མཐོངས་ལོས་སྤྲོད།དོན་དག་འདིའི་ཐད་ནས་ང་རང་ཆེད་དུ་སྐར་མ་བདུད་འདུལ་ལ་ཐེངས་གཅིག་འཕྲད་ནས་ཁ་བརྡ་ལབ་གླེང་བྱ་རྒྱུའི་འདུན་པ་ཞིག་ངང་ངམ་ཤུགས་ཀྱིས་སྐྱེས།
ངས་སྐད་འཕྲིན་གྱི་ལམ་ནས་སྐད་བསྐུར་ནས་སྐར་མ་བདུད་འདུལ་དང་དངོས་སུ་ངོ་འཕྲད་ནས་ཁ་བརྡ་ཐེངས་ཤིག་བྱ་རྒྱུའི་ཁ་ཆད་བྱས་ཀྱང་།དང་ཐོག་མ་སྐར་མ་བདུད་འདུལ་གྱིས་ང་ལ་དང་ལེན་མ་བྱས་པས་མི་ཚད་ཕྱིར་འདི་འདྲའི་སྐད་ཆ་ཞིག་བཤད་པ་ལ་ང་རང་དེ་མ་ཐག་ཏུ་འཚིག་པ་ཅུང་ཙམ་ཟོས་ཀྱང་མཐར་བཟོད་པའི་ཕན་ཡོན་ལ་བསམས་ཏེ་འཚིག་པ་ཟ་བའི་སེམས་བྱུང་དེ་ཉིད་བཏང་སྙོམས་སུ་གཏོང་ཐུབ་སོང་།འོ་ན་དོན་དམ་དུ་ཁོས་ང་རང་འཚིག་པ་ཟ་ཆེད་ཀྱི་སྐད་ཆ་ཅི་ཞིག་བཤད་སོང་ཟེར་ན་འདི་ལྟ་སྟེ།ཁྱོད་ཚོ་ཤེས་ཡོན་པ་ཡིན་ཟེར་མཁན་ཚོ་ཁ་སྟོང་ནང་ནས་ཚིག་སྟོང་བཤད་ནས་ཉི་མ་གཏོང་བྱེད་ཀྱི་ཚིག་འབྲུ་སྐམ་པོ་ཏག་ཏག་ལས་ཅི་ཞིག་ཡོད།དངོས་སུ་ངོ་ཐུག་ཀྱང་མ་ཐུག་ཀྱང་རུང་དོན་ལ་ཉི་མ་འགྲོ་བྱེད་ཙམ་རེད་ཅེས་བཤད་པ་དེའོ།
གཅིག་བྱས་ན་ཚིག་ལ་སྦ་གསང་མེད་པར་བཤད་ཡོང་བ་འདི་སྐར་མ་བདུད་འདུལ་ལྟ་བུའི་འབྲོག་པ་ཇི་སྙེད་ཅིག་གི་འབྲོག་གཤིས་ཡིན་ཀྱང་སྲིད།དེ་ཡིན་ན་ང་རང་དེ་ལ་མི་འཐད་རྒྱུ་ཅི་ཡང་མེད་དེ་དེང་སང་འབྲོག་གཤིས་རྣལ་མ་བོར་ནས་ཕྱི་ཚུལ་མ་གཏོགས་ནང་སེམས་ཀྱི་མ་ལག་གཞན་ཞིག་ཏུ་གསར་བསྒྱུར་བྱས་པ་ཇེ་མང་ནས་ཇེ་མང་རེད་ཟེར་བ་དེ་བདེན་པའི་གཞི་རུ་གྱུར་ཡོད་པས།འདི་ལྟ་བུའི་གནས་བབ་ལ་བསམ་ཚུགས་ཏེ་ང་རང་འཚིག་པ་ཟ་བའི་སེམས་ཁམས་ཤིག་ནས་ལྷག་ཏུ་ནས་ཀྱང་ཁོ་དང་ཉེ་བར་བཅར་འདོད་ཀྱི་སེམས་པ་ཞིག་བྱུང་།རེད་ཡ།མཚམས་རེར་མི་སེམས་ནི་འདི་ལྟར་རང་གིས་རང་ལ་ཚོད་འཛིན་ཐེབས་སླ་བ་ཞིག་ཡིན་པས་མི་ཚད་འགྱུར་བ་འགྲོ་སླ་བ་ཞིག་ཀྱང་རེད།
ང་རང་སྐར་མ་བདུད་འདུལ་ལ་དངོས་སུ་ངོ་འཕྲད་ནས་སྐད་ཆ་འགའ་བཤད་ན་བསམ།ཁོས་ང་ལ་དེ་ལྟར་བསྙོན་འཛུགས་པ་ལྟར་ངོ་མཚང་འདྲུ་བ་བཞིན་དུ་ཚིག་རྩུབ་སྨྲས་ཀྱང་།ངས་མུ་མཐུད་ནས་ཚིག་ལྷོད་པོའི་སྒོ་ནས་ཁོ་དང་ངོ་འཕྲད་བྱེད་རྒྱུའི་ཁ་ཆད་བྱས་སྟབས།པགས་པ་གྱོང་བོའི་རིགས་ལ་པགས་མཉེད་བྱས་ཀྱིན་བྱས་ཀྱིན་ཇེ་འཇམ་དུ་འགྲོ་རྒྱུ་ཡོད་པ་ལྟར་ཁོའི་གཤིས་ཀ་ཡང་ཇེ་གཉོམ་ནས་ཇེ་གཉོམ་ཡིན་པ་ལྟར་མཐའ་མཇུག་ང་དང་དངོས་སུ་ངོ་འཕྲད་རྒྱུའི་ཁ་དན་བཞག མ་གཞི་འབྲོག་གཤིས་གྱོང་བོའི་རིགས་ལ་ཡང་ཐོད་བརྒལ་འབྱུང་དུ་འཇུག་ཐུབ་པ་ཞིག་རེད་དེ།གཙོ་བོ་ང་ཚོ་ལ་ངང་རྒྱུད་རིང་བའི་འབྲེལ་ལམ་ཁྲོད་ཀྱི་ཐབས་ཤེས་ཤིག་ཡོད་མེད་དེ་ག་རང་རེད་སྙམ།གང་ལྟར་སྐར་མ་བདུད་འདུལ་དང་ངེད་གཉིས་ཀླུ་གཞུང་སྡེ་བའི་མེ་ཏོག་ཐང་ཞེས་པའི་རྩྭ་ཐང་དེ་ནས་དངོས་སུ་ངོ་ཐུག་རྒྱུའི་དུས་ཆད་བཏབ།
མེ་ཏོག་ཐང་གི་དགུན་གཞུང་ནིི་གྲང་རླུང་འུར་འུར་དུ་ལྡང་ནས་མི་སེམས་ལ་མཐོ་སྒང་གི་ནམ་ཟླ་ཟེར་ན་འདི་འདྲ་ཡིན་ཞེས་ངོ་སྤྲོད་བྱེད་པ་དང་འདྲ་ཡང་།མེ་ཏོག་ཐང་གི་དབྱར་གཞུང་ནི་དྲོད་རླུང་དྲོད་ལམ་ལམ་དུ་རྒྱུ་ནས་མི་སེམས་ལ་མཐོ་སྒང་གི་བདེ་སྐྱིད་ཟེར་ན་འདི་འདྲ་ཡིན་ཞེས་ར་སྤྲོད་བྱེད་པ་དང་འདྲ།དབྱར་གཞུང་དུ་འདི་རུ་ཡུལ་ཕྱོགས་གཞན་ནས་ཐོན་པའི་ཡུལ་སྐོར་བ་མང་ལ་ས་གནས་རང་ནས་ཐོན་པའི་ཡུལ་མི་སྤུན་ཟླ་ཡང་གང་མང་མང་ཡིན།ཁོ་ཚོའི་ཁྲོད་དུ་ལྟ་སྐོར་བྱེད་ཞོར་དུ་རྩྭ་ཐང་གི་མཛེས་པ་པར་མིག་དང་བརྙན་མིག་ཏུ་བསྐྱོན་མཁན་ཡོད་ལ།ཡང་སེམས་ཁམས་ལྷོད་ལྷོད་དུ་བརྩེེེ་དུང་གི་སྣང་བས་སྦྲེལ་བའི་གཞོན་ནུ་ཕོ་མོ་ཟུང་གི་དུས་ཆད་བཏབ་པའི་ལྷན་འཛོམས་ཀྱང་ཞ་དང་ཞོར་ནས་མཐོང་ཐུབ།སྐར་མ་བདུད་འདུལ་དང་ངེད་གཉིས་ནི་པར་ཆས་དང་བརྙན་ཆས་ཐོགས་པའི་ལྟ་སྐོར་བ་དེ་ཚོ་དང་མི་འདྲ་ལ།བརྩེ་དུང་གི་ཆེད་དུ་དུས་ཆད་བཏབ་པའི་གཞོན་ནུ་ཕོ་མོ་དེ་དག་ལ་ཡང་མི་འདྲ།ངེད་གཉིས་ནི་ཆེས་སྤྱིར་བཏང་གི་གྲོགས་པོ་ཞིག་གི་འབྲེལ་བའི་ཐད་ནས་འཛོམས་པ་ཡིན།
གཤིས་ཀ་གྱོང་ཞིང་རང་གཤིས་དམར་རྗེན་དུ་མངོན་ཐུབ་པའི་འབྲོག་ཕྲུག་འདི་ལ་ངས་གང་ཞིག་གི་བརྗོད་གཞི་འཁྱེར་ཡོང་ནས་ཁ་བརྡ་གླེང་སློང་འདིའི་སྒོ་མོ་ཕྱེས་ན་ལེགས་སམ།རྩོམ་རིག་འཆད་ན་སུན་རྒྱུ་རེད།ལོ་རྒྱུས་བཤད་ན་སུན་རྒྱུ་རེད།རིག་གཞུང་བརྗོད་ན་ཡང་སུན་རྒྱུ་རེད།ལུས་རྩལ་ལབ་ན་ཡང་སུན་རྒྱུ་རེད།འོ།རེད་ཡ།དཔལ་འབྱོར་གླེང་ན་དགའ་ན་ཐང་།དེས་ན་ད་ནི་དཔལ་འབྱོར་གླེང་བར་བྱེད།དཔལ་འབྱོར་གླེང་ཞོར་དུ་ཟུར་བལྟས་ལེབ་མཐོང་གིས་མཁས་པ་ཡོད་དོ་ཅོག་ངན་པར་བརྩི་བའི་སྐར་མ་བདུད་འདུལ་གྱི་ནོར་འཁྲུལ་འདི་ལ་ངེས་ཤེས་ཤིག་ཨེ་འདྲོངས་བལྟ།གལ་སྲིད་ལམ་ལྷོང་བྱུང་སོང་ན་དོན་བཟང་ཞིག་རེད་ལ་ལམ་ལྷོམ་མ་བྱུང་ན་ཡང་ལྷན་དུ་འཛོམས་པའི་ཕྱིར་དྲན་ཆུང་ཆུང་ཞིག་ཅིས་ཀྱང་ཡིན་པ་འདྲ།
'ད་ལྟའི་ཆར་འཛམ་གླིང་གི་ཕྱུག་བདག་ཨང་དང་པོ་དེ་སུ་རེད།'
འདི་ནི་ངས་ཆེད་དུ་བསམ་གཟས་ནས་སྐར་མ་བདུད་འདུལ་ལ་བཏོན་པའི་དྲི་བ་ཞིག་ཡིན།དྲི་བ་འདི་བཏོན་མ་ཐག་ཏུ་སྐར་མ་བདུད་འདུལ་གྱིས་ཁོང་དགོད་མིག་ལ་མི་རན་པ་ཞིག་བྱེད་ཞོར་བཤད་རྒྱུར།འཛམ་གླིང་མ་གླིང་བཤད་ནས་ཅི་བྱེད་དམ།དེ་ང་ཚོ་ལ་འབྲེལ་བ་ཡོད་དམ་ཞེས་ང་ལ་ཕྱིར་ལྡོག་འདྲི་ལྟ་བུའི་སྐད་ཆ་འདི་བཤད།ཁོ་ནི་དངོས་ནས་སེམས་སུ་གང་ཤར་ཁ་ནས་བྱོ་ཐུབ་མཁན་ཞིག་རེད།ང་རང་ཐད་ཀ་ཐད་སོའི་མི་གཤིས་འདིའི་རིགས་ལ་མི་འཐད་རྒྱུ་ཅི་ཡང་མེད་ཀྱང་།ཐད་ཀ་ཐད་སོའི་མི་གཤིས་འདིའི་རིགས་ཀྱིས་ཁོ་ཚོར་ཆག་སྒོ་ཡང་སློང་སྲིད་དེ།རྟ་མག་མོག་གི་སྤུ་ལྟ་བུའི་སྤྱི་ཚོགས་འདིིའི་སྒང་དུ་ཐད་ཀ་ཐད་སོའི་སྐད་ཆ་ཐེག་མི་ཐུབ་མཁན་ཡང་གང་མང་མང་ལོས་ཡིན།གང་ལྟར་ངས་ནི་སྐར་མ་བདུད་འདུལ་ལ་རང་གིས་བཤད་འདོད་པའི་སྐད་ཆ་དེ་ཅིས་ཀྱང་བཤད་ཚར་དགོས།
ང་ཚོ་འཛམ་གླིང་དུ་འཚོ་མཁན་ཞིག་ཡིན་ཕྱིན་འཛམ་གླིང་ཟེར་བ་དེ་ཡང་ང་ཚོ་དང་འབྲེལ་བ་ལོས་ཡོད།ད་ལྟའི་ཆར་འཛམ་གླིང་གི་ཕྱུག་བདག་ཨང་དང་པོ་ནི་ཨ་མེ་རི་ཀའི་ཨེ་ལོན་མ་སི་ཁི་མ་ཡིན་ནམ།ཨེ་ལོན་མ་སི་ཁི་ནི་ཕྱུག་བདག་ཅིག་ཡིན་པ་གཅིག་པུས་ག་ལ་ཚད་དེ་ཁོ་རང་ཚན་རིག་པ་ཞིག་ཀྱང་ཡིན་རབས་བཤད།ཁ་གསལ་བོར་བཤད་ན་ཁོ་ཡང་མཁས་པ་ཞིག་རེད།ཁྱོད་ཀྱིས་མཁས་པ་ཞེས་མཁས་པ་ཡོད་དོ་ཅོག་ལ་སྐྱོན་རྒྱག་བཞིན་འདུག་པ་དེ་ནི་ནོར་འཁྲུལ་ཞིག་རེད།མཁས་པའི་ཁྲོད་ན་ཡང་དག་ཐེར་བྱེད་དགོས་པའི་མཁས་པ་ལོས་ཡོད་ཀྱང་།མཁས་པ་ཡོད་ཚད་ཁྱོད་ཀྱིས་བཤད་པ་ལྟར་གྱི་དེ་འདྲའི་ལེན་སྲོལ་མེད་པ་ཏག་ཏག་གང་ནས་ཡིན།ཡང་གཅིག་བཤད་ན་ད་ལྟ་འབྲོག་གཤིས་རྣལ་མ་མངའ་བའི་འབྲོག་པ་ཡང་ཇེ་ཉུང་ནས་ཇེ་ཉུང་ཡིན་ཙ་ན།ང་ཚོ་སུས་སུ་ལ་ཡོངས་ཁྱབ་ཏུ་སྐྱོན་བརྗོད་བྱེད་དམ།དྲང་མོར་བཤད་ན་ང་ཚོས་མཉམ་གཅིག་ཏུ་ང་ཚོའི་ལེགས་ཆ་ལ་ལེགས་སྒྲིག་དང་ང་ཚོའི་ཞན་ཆ་ལ་ཁ་གསབ་རྒྱག་དགོས་པ་མ་རེད་དམ།
ངས་གོང་ལྟར་འཛམ་གླིང་གི་ཕྱུག་བདག་ཆེན་མོ་ཨེ་ལོན་མ་སི་ཁི་དཔེ་དྲངས་ནས་མཁས་པ་ཡོད་ཚད་ནི་ཁ་སྟོང་ནང་ནས་ཚིག་སྟོང་བཤད་ནས་ལག་ལེན་གྱི་རྩ་བ་རུལ་བའི་མི་ནུས་མེད་ཏག་ཏག་མིན་པ་བསྒྲུབ་ཀྱང་།སྐར་མ་བདུད་འདུལ་གྱིས་ཕྱིར་ང་ལ་སྲབ་ཅིང་སྲབ་པའི་ཁ་ཤ་དེ་འགུལ་ཞོར་དུ་བཤད་པའི་སྐད་ཆ་ཡིས་ངེད་གཉིས་ཀྱི་སྐད་ཆའི་མཐོ་རླབས་ལྟ་བུ་ཞིག་འཕྱུར་དུ་བཅུག་སོང་བ་སྟེ།ཁོས་མིད་ཐག་ཕྲ་མོ་བསལ་ཙམ་བྱས་ཏེ་བཤད་རྒྱུར།འཛམ་གླིང་ཟེར་ན་ཆེན་པོ་ཞིག་རེད།དེའི་ནང་ན་མཁས་པ་ཡིན་ཡང་མི་ཕྱུག་པོ་དབང་ཆེན་དང་མི་ནུས་པ་ཅན་གཅིག་གཉིས་རེ་ལོས་ཡོད།གང་ལྟར་ངས་ནི་ང་ཚོའི་ཕ་ཡུལ་འདིའི་མཁས་པ་རྣམས་ལ་ཁས་ལེན་འདོད་ཀྱི་རྣམ་འགྱུར་མེད།ང་ཚོའི་ཕ་ཡུལ་གྱི་མཁས་པ་ཡིན་སྙམ་མཁན་དེ་ཚོ་ནི་ཁ་བདེ་ལྕེ་བདེ་བྱེད་ཤེས་པའི་བྱ་ནེ་ཙོ་ལྟ་བུ་ཏག་ཏག་ལས་ཅི་ཡང་མ་རེད་ཅེས་བཤད་པ་ན།ངའི་སེམས་སུ་སླར་ཡང་སྐད་ཆ་ཚན་པ་རེ་མི་བཤད་ཐབས་མེད་གྱུར་སོང་སྙམ་ཞིང་།ཏག་ཏག་སྐབས་ཐོག་དེར་འདི་ག་མེ་ཏོག་ཐང་གི་བར་སྣང་དུ་སྤྲིན་གྱི་འདུ་འགོད་སྣ་མ་སྣ་ཚོགས་འཁྲིགས་ཏེ།དུས་སྐད་ཅིག་དེ་ཉིད་ལ་ནམ་མཁའ་རུ་སྤྲིན་གྱི་གྲོང་ཁྱེར་ལྟ་བུ་ཞིག་ཆགས་འགོ་བརྩམས།
གལ་ཏེེེ་ང་ཚོའི་ཕ་ཡུལ་དུ་ཁྱོད་ཀྱིས་བཤད་པ་ལྟར་གྱི་ནེ་ཙོ་ལྟ་བུའི་མཁས་པ་ཏག་ཏག་ལས་ཅི་ཡང་མེད་ན།ཕ་ཡུལ་འདིའི་རྣམ་པ་ག་འདྲ་ཞིག་ཏུ་ཆགས་ཡོད་རྒྱུ་རེད།རྒྱལ་ཁབ་ཅིག་ལ་དབུ་འཁྲིད་པའི་དབུ་འཁྲིད་པ་མཁོ་བ་ལྟར་ས་གནས་ཤིག་ལ་ཡང་སྣེ་འཁྲིད་པའི་སྣེ་འཁྲིད་པ་མཁོ་བ་རེད།དེ་ཙ་ན་ས་གནས་གང་ཞིག་གི་མཁས་པའམ་ཤེས་ཡོན་པའི་སྡེ་ནི་ས་གནས་གང་དེའི་མཁས་པ་དང་ཤེས་ཡོན་པའི་སྡེ་ཡིན་པ་མ་ཟད།ས་གནས་གང་དེར་སྣེ་འཁྲིད་ཐུབ་པའི་སྣེ་འཁྲིད་པའི་སྡེ་ཡང་ཡིན།ང་རང་ཁྱོད་ཀྱི་སེམས་ལ་གང་དྲན་ཁ་ནས་སྦ་གསང་མེད་པར་ཐད་ཀར་དུ་བཤད་ཐུབ་པའི་འབྲོག་གཤིས་འདི་ལ་ཞེ་དྲག་དགའ་བོ་བྱུང་ཡོད་ཀྱང་།ཁྱོད་ཀྱི་མཁས་པ་རེ་ཟུང་གི་བྱ་སྤྱོད་ལས་འཕྲོས་ཏེ་མཁས་པ་སྤྱི་ལ་ནག་འདེད་བྱེད་པའི་བསམ་བློ་དེ་ལ་མི་འཐད།དེའི་ཐད་ནས་ཁྱོད་དང་དངོས་སུ་ངོ་འཕྲད་ནས་ཁ་བརྡ་ཞིག་བྱ་འཆར་ཡོད་སྟབས།ད་རེས་ཀྱི་ལྷན་འཛོམས་འདིའི་མཐར་ཐུག་གི་འབབ་ས་ཡང་འདི་ཡིན་ཟེར་ཆོག ཁྱོད་ཀྱིས་ངའི་སྐད་ཆ་འདིའི་བདེན་རྫུན་གྱི་དབྱེ་བ་ཇི་ལྟར་ཕྱེས་ཀྱང་རུང་།གང་ལྟར་ངས་ནི་ཁྱོད་ལ་བཤད་འདོད་པའི་སྐད་ཆ་ཞིག་བཤད་ཚར་ཡོད།འདི་ནི་ང་ལ་མཚོན་ན་སེམས་ཁ་ཇེ་ཡང་ལ་གཏོང་སྟངས་ཤིག་ཡིན།
ལེ་བདའ་ཡོད་ལ་སེམས་གཏམ་ཡང་མངའ་བའི་སྐད་ཆ་འདི་བཤད་ཚར་མ་ཐག་ཏུ།སྐར་མ་བདུད་འདུལ་གྱི་སེམས་ལ་ཅི་ཞིག་དྲན་པ་ལྟར་ཡུད་ཙམ་ལ་གཟབ་ནན་གྱི་རྣམ་འགྱུར་ཞིག་དང་བཅས་ཏེ་ང་ཡི་གདོང་ལ་འབུར་ཚུགས་སུ་ཅེར་ནས་བསྡད་པ་ན།ངའི་སེམས་སུ་ད་ཡང་ཁོའི་སྲབ་ཅིང་སྲབ་པའི་ཁ་ཤ་དེ་འགུལ་ཞོར་དུ་ང་དང་ལྡོག་ཕྱོགས་ཀྱི་སྐད་ཆ་ཅི་ཞིག་བཤད་འོང་སྙམ་ཅིང་།ད་ནི་ཁོས་དགག་ལན་ཇི་ལྟར་བཏབ་ཀྱང་ང་རང་ཁུ་སིམ་མེར་ཁ་རོག་གེར་འདུག་རྩིས་ཡོད་ཀྱང་།ཡིད་ལ་ཡང་མ་ཤར་བ་ཞིག་ལ་སྐར་མ་བདུད་འདུལ་གཞི་ནས་མི་གཞན་ཞིག་ཏུ་གྱུར་སོང་བ་ལྟར་ཐོག་མའི་རྣམ་འགྱུར་ལ་འགྱུར་བ་ཐེབས་འདུག་སྟེ།ཁོས་ང་ལ་དགག་ལན་རྒྱག་རྒྱུ་ཕར་ཞོག་དང་ད་དུང་དེ་ལས་ལྡོག་སྟེ་དེེེ་རིང་གི་ངེད་གཉིས་ཀྱི་ཁ་བརྡ་ལ་དོན་སྙིང་གིས་ཕྱུག་སོང་ཞེས་བཤད་སྐབས་ཀྱི་ངོ་མདངས་ནི་ཤིན་ཏུ་ནས་ཀྱང་ལྷོད་ལ་བབས་ཤིང་གཟབ་ནན་གྱིས་ཡོངས་སུ་ཁེངས་ཡོད་པ་ཞིག་རེད།
ང་རང་ཁོའི་གློ་བུར་བུའི་འགྱུར་ལྡོག་ལ་དེ་འདྲ་ཡིད་མི་ཆེས་པ་ལྟར་གཤམ་གྱི་དྲི་བ་འདི་འདྲ་ཞིག་རང་ཤུགས་སུ་བཏོན་སོང་།སྐར་མ་བདུད་འདུལ་བཟས་ཡ།ཁྱོད་ཀྱིས་ད་ལྟ་ང་ལ་ཕྱིར་ཚིག་རྩོད་མི་བྱེད་དོན་ཅི་ཡིན་ནམ་ཞེས་དྲིས་པ་ན།སྐར་མ་བདུད་འདུལ་གྱིས་སྔར་བཞིན་གདོང་ལ་གཟབ་ནན་གྱི་མདངས་ཤིག་མངོན་བཞིན་བཤད་རྒྱུར།བཤད་པའི་སྐད་ཆ་ལ་གནས་ལུགས་མངའ་ན་དགྲ་བོ་ཡིན་ཡང་མཆོག་ཏུ་བཀུར་ལོས་དགོས།ཁྱོད་ངའི་དགྲ་བོ་མིན་ཡང་དགྲ་བོ་ཡིན་པའི་དབང་དུ་བཏང་ན།དེ་རིང་ངས་ཁྱོད་ལ་ལགས་སོ་དང་ལགས་སོ་ཟེར་རྒྱུ་ལས་ཐབས་གཞན་མི་འདུག་ཅེས་ལབ་ཅིང་།མུ་མཐུད་ནས་ཧ་ཧ་ཧ་དེ་འདྲ་ཞིག་ཨེ་རེད་ཅེས་ཧབ་ཆ་སྙིང་ལ་འབབ་པ་ཞིག་བྱས་པ་དེས་ང་ཡི་སེམས་ཁམས་གཞི་ནས་བདེ་ལ་འབབ་དུ་འཇུག་ཐུབ་སོང་ལ།བདེན་སྣང་ཤར་ན་དེ་མ་ཐག་ཏུ་དང་ལེན་ཐུབ་པ་འདི་ཡང་འབྲོག་ཕྲུག་ཅིག་གི་འབྲོག་གཤིས་རྣལ་མ་དེ་ཉིད་ཚུལ་འཆོས་ཀྱི་ཕྱི་ཤུན་མེད་པར་ཕྱི་རུ་མངོན་སྟངས་ཤིག་གང་ནས་མིན་ནོ་སྙམ་སོང་།
མི་ཞིག་ཡིན་ན་མི་སེམས་སྤྲིན་པ་དང་འདྲ་ཡང་རང་ཚུགས་ལྕགས་ཀྱི་ཕུར་བ་བཞིན་བརྟན་དགོས།ད་ཅི་འདི་ག་མེ་ཏོག་ཐང་གི་བར་སྣང་དུ་སྤྲིན་གྱི་གྲོང་ཁྱེར་ལྟ་བུ་ཞིག་འཁྱིལ་བ་དེ་ཡང་ད་ནི་ཡོངས་སུ་འགྱུར་ཏེ་ནམ་མཁའ་ན་དབྱིབས་དང་རྣམ་པ་སྣ་ཚོགས་སུ་སྣང་བའི་སྤྲིན་གྱི་ཚོམ་བུ་ཐར་ཐོར་ཞིག་ལས་མི་འདུག་ཅིང་།རྒྱང་རིང་རྒྱང་རིང་གི་རི་རྩེ་གན་ན་རྗེས་ལ་དུ་བ་དཀར་པོའི་ལམ་དཀར་ཞིག་དཀར་རིང་སེ་འཐེན་པའི་གནམ་གྲུ་ཞིག་ཡུལ་ཕྱོགས་གང་ཞིག་ཏུ་ཝིར་སྒྲ་ཞིག་དང་བསྡོངས་ཏེ་འཕུར་བཞིན་འདུག སྐབས་དེ་དུས་སུ་ངའི་སེམས་ལ་འདི་ལྟ་བུའི་བསམ་ཚུལ་ཞིག་སྐྱེས་འོང་བ་སྟེ།ནམ་ཞིག་ང་རང་ཚོའི་ཕ་ཡུལ་གྱི་མཁས་པ་རྣམས་ཀྱིས་ལྕགས་ལོག་ལོག་ཅིག་ནམ་མཁའ་རུ་འཕུར་དུ་འཇུག་ཐུབ་བམ།གལ་སྲིད་ཐུབ་ན་ནི་ལྕགས་ལོག་ལོག་དེའི་ནང་དུ་བསྡད་དེ་ནམ་མཁའ་རུ་འཕུར་མཁན་ནི་སྐར་མ་བདུད་འདུལ་ལྟ་བུའི་འབྲོག་ཕྲུག་འདི་ཚོ་མིན་ན་སུ་ཡིན་སྙམ་པ་དེའོ།།
རྩོམ་སྒྲིག་པ། འཕགས་མི།
མཐོང་གྲོལ་དྲ་རྩོམ་དག་རྩོམ་བདག་དང་དྲ་བདག་གིས་ཆོག་མཆན་མེད་པར་རང་དགར་མི་འཁྱེར་བར་མཁྱེན།
 |
|
Signature is customized by Netease
