རྣལ་འབྱོར་སྐྱིད་པའི་ཉམས་དབྱངས།
རྗེ་བཙུན་མི་ལ་རས་པས་གསུངས།
རྣལ་འབྱོར་སྐྱིད་པའི་ཉམས་དབྱངས།
རྗེ་བཙུན་མི་ལ་རས་པས་གསུངས།
སློབ་མ་ཁག་ཅིག་གིས་རྗེ་བཙུན་ལ། འོ་ན་རི་ཁྲོད་ཁོ་ནར་བཞུགས་རུང་བསམ་གཏན་ཁང་པ་སོགས་མཐུན་རྐྱེན་རེ་དགོས་པར་འདུག་པས་བསྒྲུབ་འཚལ་ཞུས་པས། རྗེ་བཙུན་གྱི་ཞལ་ནས། ང་ལ་བསམ་གཏན་གྱི་མཁར་སོགས་མཐུན་རྐྱེན་རྣམས་འདི་འདྲ་ཡོད་གསུང་ནས་མགུར་འདི་གསུངས་སོ༎
ཕ་ཡིད་བཞིན་ནོར་བུའི་ཞབས་ལ་འདུད༎
བུ་མཐུན་རྐྱེན་འཛོམ་པར་བྱིན་གྱིས་རློབས༎
རང་ལུས་ལྷ་སྐུའི་མཁར་སྤེ་ལ༎
ངེས་ཤེས་འདྲོངས་པར་མཛད་དུ་གསོལ༎
ངས་འཇིགས་ཀྱིས་དོགས་ནས་མཁར་གཅིག་བརྩིགས༎
མཁར་ནི་ཆོས་ཉིད་སྟོང་པའི་མཁར༎
ད་ཞིག་གིས་དོགས་པ་ང་ལ་མེད༎
ངས་གྲང་གིས་དོགས་ནས་གོས་ཤིག་བཙལ༎
གོས་ནི་གཏུམ་མོ་ཨ་ཤད་གོས༎
ད་གྲང་གིས་དོགས་པ་ང་ལ་མེད༎
ངས་དབུལ་གྱིས་དོགས་ནས་ནོར་ཞིག་བཙལ༎
ནོར་ནི་འཛད་མེད་འཕགས་ནོར་བདུན༎
ད་དབུལ་གྱིས་དོགས་པ་ང་ལ་མེད༎
ངས་ལྟོགས་ཀྱིས་དོགས་ནས་ཟས་ཤིག་བཙལ༎
ཟས་ནི་ཆོས་ཉིད་ཏིང་འཛིན་ཟས༎
ད་ལྟོགས་ཀྱིས་དོགས་པ་ང་ལ་མེད༎
ངས་སྐོམ་གྱིས་དོགས་ནས་བཏུང་བ་བཙལ༎
བཏུང་བ་དྲན་ཤེས་བདུད་རྩིའི་ཆང་༎
ད་སྐོམ་གྱིས་དོགས་པ་ང་ལ་མེད༎
ངས་སྐྱོ་ཡིས་དོགས་ནས་གྲོགས་ཤིག་བཙལ༎
གྲོགས་ནི་བདེ་སྟོང་རྒྱུན་གྱི་གྲོགས༎
ད་སྐྱོ་ཡིས་དོགས་པ་ང་ལ་མེད༎
ངས་ནོར་གྱིས་དོགས་ནས་ལམ་ཞིག་བཙལ༎
ལམ་ནི་ཟུང་འཇུག་ཡངས་པའི་ལམ༎
ད་ནོར་གྱིས་དོགས་པ་ང་ལ་མེད༎
ནོར་འདོད་དགུ་ཚང་བའི་རྣལ་འབྱོར་ང་༎
གནས་གང་དུ་བསྡད་ཀྱང་སྐྱིད་པར་འདུག།
ཡོལ་མོ་སྟག་ཕུག་སེང་གེ་རྫོང་༎
སྟག་མོའི་ངར་སྐད་སྐྱི་ཤ་ཚ༎
དེས་དབང་མེད་སྐུ་མཚམས་དམ་དུ་བཅུག།
ང་སྟག་ཕྲུག་གི་རྩེད་འཕྱོ་སྙིང་རྗེ་སྐྱེ༎
དེས་དབང་མེད་དུ་བྱང་སེམས་བསྒོམ་དུ་བཅུག །
སྤྲེའུའི་ཙི་སྒྲ་ཞེ་ལ་བཅགས༎
དེས་དབང་མེད་དུ་སྐྱོ་ཤས་སྐྱེ་རུ་བཅུག།
སྤྲེལ་ཕྲུག་གི་སྐུ་སྒྲ་དགོད་སྙིང་འདོད༎
དེས་དབང་མེད་དུ་སེམས་བསྐྱེད་བསྒོམ་དུ་བཅུག།
ཁུ་བྱུག་གི་ངག་སྙན་ཡིད་རྩ་སྐྱོ༎
དེས་དབང་མེད་དུ་མཆི་མ་འཆོར་དུ་བཅུག།
ཅོ་གའི་འགྱུར་སྐད་རྣ་བར་སྙན༎
དེས་དབང་མེད་དུ་རྣ་བ་སྙན་དུ་བཅུག།
བྱ་རོག་གི་སྒྲ་སྐད་སྣ་ཚོགས་པ༎
རྣལ་འབྱོར་འདུག་གྲོགས་སེམས་ལ་ཕན༎
གནས་འདི་འདྲར་བསྡད་ན་ངང་གིས་སྐྱིད༎
གྲོགས་གཅིག་ཀྱང་མེད་ན་དེ་བས་སྐྱིད༎
རྣལ་འབྱོར་སྐྱིད་པའི་ཉམས་དབྱངས་འདིས༎
འགྲོ་བའི་སྡུག་བསྔལ་སེལ་བར་ཤོག།
ཅེས་གསུངས་པས། དེ་དུས་ཀྱི་བུ་སློབ་རྣམས་ལ་སྐྱོ་ཤས་དང་ངེས་འབྱུང་དྲག་པོ་སྐྱེས་ནས་རི་ལས་མི་འབབ་པའི་དམ་བཅའ་ཕུལ་ནས་བསྒོམས་པས་དགེ་སྦྱོར་མཐར་ཕྱིན་པ་ཁོ་ན་བྱུང་བ་ཡིན་ནོ། །དེ་ནས་རྗེ་བཙུན་ལ་ཡང་ཡི་དམ་གྱིས་ད་ཡང་བོད་ལ་སོང་ལ་རི་ཁྲོད་དབེན་པར་སྒོམ་བཞིན་པའི་ངང་ནས་འགྲོ་བའི་དོན་གྱིས་ཤིག །བསྟན་པ་དང་སེམས་ཅན་ལ་ཕན་པར་འགྱུར་རོ་བྱ་བའི་ལུང་བསྟན་བྱུང་བས། རྗེ་བཙུན་ཡང་ཐུགས་བོད་ལ་ཆས་སོ༎
རྩོམ་སྒྲིག་པ། མྱི་གསར་བ།
མཐོང་གྲོལ་དྲ་རྩོམ་དག་རྩོམ་བདག་དང་དྲ་བདག་གིས་ཆོག་མཆན་མེད་པར་རང་དགར་མི་འཁྱེར་བར་མཁྱེན།
 |
|
Signature is customized by Netease
