སོང་སོང་པའི་མཐའ་མར། སྙན་ཚོམ།
ཡིག་སྒྱུར་བ། མར་ཁུ་རྒྱལ་མཚན།
སོང་སོང་པའི་མཐའ་མར། སྙན་ཚོམ།
མཱ་ཞིན་གྱིས་བརྩམས།
མར་ཁུ་རྒྱལ་མཚན་གྱིས་བསྒྱུར།
བྱེ་ཐང་གི་ཕྱིར་དྲན།
སྟོང་བ་ནི་རླུང་ངོ
སྟོང་ཉིད་ནི་རླུང་གཞན་ཞིག་གོ
སྐྱེ་བ་སྔོན་མའི་མི་དང་བྱ་བ་མཐའ་དག
ཧ་ལམ་བརྗེད་འདུག
བྱང་ནས་ལྷོ་རུ་བསྐྱོད་པའམ
ཡང་བསྐྱར་ལྷོ་ནས་བྱང་དུ་ཆས
མི་ཞིག་གི་དྲན་ངོགས་ན ས་ཆ་འདིའི་རྡེའུ་ཁ་ཤས་ལས་
ཅི་ཡང་ལྷག་མི་འདུག
ཡཱ་ཨའོ་སྐམ་ས་ཆེན་མོའི་དཀྱིལ་སྙིང་མྱུལ་བའི་ཟིན་ཐོ།
ང་རི་ལུང་མང་པོ་བརྒལ་ནས་ཐཱ་གྲོང་ལ་འབྱོར
དེ་ནས་ཡང་ཐཱ་གྲོང་ནས་ཤར་ལྷོའི་སྤྱི་ལེ90ཕྱོགས་སུ་ཆས
ཤར་གྱི་གཞུང་ཐིག 83°36' འཕྲེད་ཐིག་བྱང་མ46°14'
ང་ཡཱ་ཨའོ་སྐམ་ས་ཆེན་མོའི་དཀྱིལ་སྙིང་ན་འགྲེང་ཡོད
ས་ཁམས་ཚད་འཇལ་བྲིས་རིས་ཀྱི་གཞི་གྲངས་ལྟར་ན
སྐབས་འདིར ཡཱ་ཨའོ་སྐམ་ས་ཆེན་མོའི་སྟེང་ནས
ང་ཁོ་ན་ནི་རྒྱ་མཚོ་དང་། རྒྱང་རིང་དང་ཆེས་རྒྱང་ཐག་རིང་བའི་མི་དེ་ཡིན་འདུག
ཡུལ་བསྐོར་བ་དང་མགྲོན་པོ་ཚང་མ་སོང་ཚར་འདུག ང་ལ་བསྐྱུར་བའི་ཁུ་སིམ་དང་ཁེར་རྐྱང་
ཧ་ལམ་ཡཱ་ཨའོ་སྐམ་ས་ཆེན་མོ་ལས་ཀྱང་ཆེ་ཨང་སྙམ་བྱུང་།
འོན་ཏེ་གནམ་འོག་གི་རི་ཀླུང་དང་འགྲོ་བ། སྐབས་འདིར་ང་དཀྱིལ་སྙིང་དུ་བཟུང་སྟེ
ལྟེ་མཐུན་སྒོར་དབྱིབས་ཤིག་བྲིས་པ་ཡིན་ན
ཁྱོད་ཚོ་ཚང་མ་ངས་ལྡེམ་ཤུགས་ཀྱིས་འཕངས་པའི་ཚངས་ཐིག་ཕྱེད་ཀའི་སྟེང་གི་
ཚེ་འདིའི་ཕན་ཚུན་འབྲལ་ཐབས་མེད་པའི་གཉེན་ཉེ་ཡིན་སྲིད
བྱེ་ཐང་སྟེང་གི་ཚྭ་སྡོང་གི་ཡལ་ཀ
ཁུར་པཎ་ཐོང་ཀུའུ་ཐི་བྱེ་ཐང་ནས
ངས་བྱེ་སྒང་གི་རྩེ་ནས་ཚྭ་སྡོང་གི་ཡལ་ཀ་ཞིག་བཏུས་ཤིང་
བྱེ་སྒང་གི་འདབས་ནས་ཀྱང་ཚྭ་སྡོང་གི་ཡལ་ཀ་ཞིག་བཏུས
ངས་དེ་ཚོ་རས་ཁུག་ཅིག་གི་ནང་དུ་བཅུག་སྟེ
བྱེ་ཐང་ནས་བུད་དེ
གནམ་ཐང་དུ་འབྱོར གནམ་གྲུའི་སྤ་སེ་ཉོས་ནས
གནམ་གྲུའི་ཕྱོགས་སུ་འགྲོ་དུས
བདེ་བཤར་མི་སྣས་འདི་ནི་ཅི་ཡིན་ནམ་ཞེས་དྲིས་འོང་
ངས“ རིན་པོ་ཆེ།
ང་ཡི་རིན་པོ་ཆེ”ཞེས་ལན་བཏབ།
རི་མཐོ་ཞིང་ལམ་རིང་ནའང་
ཚྭ་སྡོང་གི་ཡལ་ཀ་གང་དུ་ཡོད་ན
བྱེ་ཐང་གནས་དེ་ན་ཡོད
ཚྭ་སྡོང་གི་ཡལ་ཀས་བྱེ་ཐང་གི་རྣམ་ཤེས་ཁྱེར་ནས་ཐཱན་ཧྲན་བརྒལ་ཞིང
མདོ་ལ་བརྒལ་ནས ས་སེར་མཐོ་སྒང་བརྒལ་ནས
ང་ཡི་ཁེར་རྐྱང་དང་རྨོངས་འཐོམས་བརྒལ་ནས
ད་ལྟ འཇིག་རྟེན་སྟེང་ན་ཁུར་པཎ་ཐོང་ཀུའུ་ཐི་བྱེ་ཐང་གཉིས་ཡོད་དེ
གཅིག་ནི་ལི་ཡུལ་གྱི་བྱང་ཕྱོགས་ན་ཡོད་ཅིང
ཅིག་ཤོས་ནི་ང་ཡི་དཔེ་ཁང་ནང་ན་ཡོད
གངས་ཏི་སེ།
བྱ་རྒོད་ལགས ཁྱེད་ཀྱིས་མུ་མཐུད་དུ་གངས་རི་བདག་ཏུ་བཟུང་ནས་རྒྱལ་པོར་བཞུགས་རོགས
ནོར་ནག་ལགས ཁྱེད་ཀྱིས་གྲོག་རོང་རེ་རེ་ཁྱེད་ཀྱི་ཚེ་འདིའི་བཟའ་འབྲུ་རུ་སྒྱུར་རོགས
སྲིད་པའི་གངས་རྒན་ཨ རལ་གྲི་ཇི་བཞིན བསྟན་སྲུང་རྡོར་ལེགས་ཇི་བཞིན
སྤྲིན་དཀར་ཕུང་བོ་རེ་རེས བྱམས་དང་སྙིང་རྗེ་ཁོ་ན་བཏེགས་ནས་ང་ཚོའི་ཕྱོགས་སུ་ག་ལེར་ཡོང་གིན་འདུག
ཧ་ལོ་མྱ་ངན་ཐང་དུ།
མདུན་དུ་སྐྱོད་བཞིན གནམ་སའི་འདྲེས་མཚམས་བརྒལ་ཏེ
ཚའོ་ཐཱན་ཆེན་མོ་བརྒལ་ཏེ
ནན་ཧུའུ་བྱེ་ཐང་བརྒྱུད་དུས
རླུང་ཐང་ཆད་དེ
རྗེས་སུ་ལུས་སོང
ཉིན་གུང་གི་དུས་སུ
ནམ་མཁའི་སྤྲིན་པ་ཡོད་ཚད་ཇེ་དལ་དུ་གྱུར
ང་ངལ་ཏེ་ཤུགས་ཡོངས་སུ་ཟད་ཅིང
ཕྱིར་ལོག་འདོད་ནའང
ཚོར་སྣང་ཞིག་ལ མི་ཞིག་གིས་ངའི་རྣ་ལམ་དུ
“ མུ་མཐུད་དུ་མདུན་དུ་སྐྱོད་ཅིག ས་མ་རུབ་པའི་སྔོན་ལ ཁྱོད་རང་ཅིས་ཀྱང་ཁྱོད་ལ་ལོ་ངོ་སྟོང་གི་རིང་ལ་བསྒུགས་མྱོང་པའི་བྱེ་ཐང་གི་གཡང་ཊི་དེའི་འགྲམ་ལ་ཐོན་དུ་ཆུགས་ཤིག ”ཅེས་བརྗོད་བཞིན་འདུག
༢༠༢༥ལོའི《མི་རིགས་ཀྱི་རྩོམ་རིག》དེབ་གཉིས་པ་ལས་བཤུས།
རྩོམ་སྒྲིག་པ། འཕགས་མི།
མཐོང་གྲོལ་དྲ་རྩོམ་དག་རྩོམ་བདག་དང་དྲ་བདག་གིས་ཆོག་མཆན་མེད་པར་རང་དགར་མི་འཁྱེར་བར་མཁྱེན།
 |
|
Signature is customized by Netease
