རྫོང་སར་རྩོམ་རིག མཉམ་བཀོད་སྙན་ངག ༡
རྫོང་སར་རྩོམ་པ་པོ་མཐུན་ཚོགས།
རྫོང་སར་རྩོམ་རིག མཉམ་བཀོད་སྙན་ངག ༡
མྱི་གསར་བ། བཞག་ཚ། གྲོལ། ཁམས་འོད་གསལ། སྲོད། འབར་བློ་དཀར། འཇམ་དབྱངས་སྦྱིན་པ།
བཙན་མྱི་སད། རྣལ། ཞོགས་སད། གངས་འོད། གྲི། གཟི་ནག་པོ། ལྷ་ནག་པོ། ཆར་ཞོད། ཆང་།
དཔལ་གངས་དཀྱིལ། སྨྲ་སྲས། ཁམས་པ་རག་སྨྱོན། དཔལ་འབར། ལུང་རིགས། ཕུང་གསུམ་པ།
འགྲེལ་མི་ཕོག་པའི་གནས་ལུགས།
སྲོད། མངོན་པ་འོག་མ།
ཕན་ཚུན་སྐད་ཆའི་རྒྱུན་ལ
སེམས་ངོ་སྟོན་སྟངས་རེ་རེ་ཡོད
ཚིག་གཅིག་བདེན་ལ་ཚིག་གཅིག་རྫུན་ཡང་ཡོད
ཁྱོད་རང་ཕ་ཡུལ་དུ་སྡོད་དུས
ལྷིང་འཇགས་ཀྱི་གཏིང་རྙེད་ན་ཡང
ས་མཐའི་ཡུལ་གྱར་བ་ཚེས་ན
འུར་ཟིང་གིས་གོ་འཛོལ་བྱེད་ཡོང
སྟོན་མཇུག་འདིར
གྱེས་བྲལ་གྱི་རྣམ་འགྱུར་ལས་མཐོང་བའི
ཕ་ལགས་མཉམ་དུ་བཤད་མྱོང་བའི་མ་འོངས་པའི་འཆར་གཞི་དག་དྲན་ཡོང
སྔོན་ཆད་ཀྱི་ཁྱོད་རང་ལྟ་ན་སྡུག
ཁེར་རྐྱང་ལ་དགུན་ཁ་ཚེས་པའི་དུས་ཚོད་ཀྱང་རྗེས་ལ་ཡོད
དེ་རིང་ངས་གྲོགས་པོར
མི་ཚེ་ནི་བསམ་ཡུལ་ལས་འདས་པ་རེད་ཅེས་ཀྱང་ལན་བཏབས
ད་ལྟ་ང་ལ
རྟག་བརྟན་གྱི་སྨོན་ལམ་འདེབས་མཁན་རྨོ་བོའང་མི་འདུག
སྐྱ་འཐབ་པའི་དཀར་ནག་གི་ཐག་པ
ཇི་ལྟར་བསྡམས་ཀྱང་ཇེ་ལྷོད་དུ་གྱུར་འགྲོ་བ་ཆོས་ཉིད་ཡིན་ཨང
༢༠༢༤/༡༡/༡ རྫོང་སར།
ཕྱེ་ལེབ་ཀྱི་གཤོག་སྒྲོ་དང་དེའི་ཡང་སྙིང་།
ཆང་།
མ་གཞི་ང་ཚོ་ཚང་མ་ན་གཞོན་རེད
འོན་ཀྱང་ང་ཚོར་ན་གཞོན་གྱི་སྙིང་སྟོབས་མེད
མ་གཞི་ང་ཚོ་ཚང་མ་ང་རྒྱལ་ཡིན
འོན་ཀྱང་ང་ཚོར་ང་རྒྱལ་གྱི་གློ་སྙིང་མེད
མ་གཞི་ང་ཚོ་ཚང་མ་རྒོད་པོ་བཞིན་འཕུར་ཆོག་མོད
འོན་ཀྱང་ང་ཚོ་རུས་སྦལ་བཞིན་ནུར་ཀྱིན་ཡོད
མ་གཞི་ང་ཚོ་ཚང་མར་སྐྱེ་མཆེད་ཀྱི་དམག་རྟ་ཡོད་མོད
འོན་ཀྱང་ང་ཚོས་རང་རང་གི་དམག་རྟ་ལྕག་སྒྲོག་གི་བཅིང་ཡོད
2024-12-10
སྡུག་ལ་ཐུག་དུས་ཁྱེད་ཉིད་ལྷག་ཏུ་དྲན།
འབར་བློ་དཀར། འདུལ་བ་གོང་མ།
མི་ཐུབ་སངས་རྒྱས་སྟོང་གིས་སྤངས་པ་ཡི། །
ཞིང་འདིའི་བདུལ་དཀའི་སེམས་ཅན་མ་རུང་པ། །
ལས་ངན་བདག་གིས་ཁྱེད་ལ་མཆུད་འདི་གསོལ། །
དགྱེས་འཛུམ་སྙན་གྱི་སྒོ་མོ་བླགས་ཙམ་མཛོད། །
སྤྱན་མིག་ཧྲིག་གེར་བཞད་སྒྲ་ཐག་གེར་ངང་། །
སྐབས་རེར་ལྷ་འདྲེ་འཁོར་ཚོགས་བྲལ་དུ་བཀོལ། །
གསུངས་སྒོ་འཇམ་མེར་ཐུགས་གཤིས་ལྷོད་དེར་ངང་། །
ལན་རེར་སྙིང་རྗེ་སྤྱན་ཆབ་བསིལ་བསིལ་གནང་། །
ཡིད་དམན་རྟོག་གེ་ངན་པའི་མཚང་རྡོལ་བའི། །
རྣམ་རྟོག་འཐུལ་མེད་རྟ་རྒོད་ལང་ཤོར་འདི། །
སུས་ཀྱང་འདུལ་མི་ཐུབ་པ་བདེན་ལགས་མོད། །
ཁྱེད་ཀྱི་སྐུ་པར་ཙམ་གྱིས་བདག་ཡིད་སྐྱོམ། །
ཁེ་གྲགས་འབྱོར་བའི་རྗེས་སུ་འདུར་བ་ཡི། །
མི་ཡི་ལུས་ལ་རྩ་ཡི་སྲོག་སྙིང་ཅན། །
ཉམ་ཆུང་བདེན་པའི་གཏམ་ལ་ཁྲེལ་ན་ཡང་། །
དག་པའི་ཞིང་གི་ལྷ་ཁྱེད་དགྱེས་པས་ཆོག །
མགོན་ཁྱེད་མཁའ་སྤྱོད་མཁའ་འགྲོའི་ཚོགས་འཁོར་ལ། །
རང་དབང་ཐབས་ཤེས་གཤོག་འགྱུར་མ་ལྡེམ་པར། །
ཞལ་འཛུམ་གྱི་ལེར་ཐུགས་བརྩེ་ལྷུན་ཆགས་སེར། །
ད་ལྟ་དངོས་སུ་བཞུགས་ན་དགའ་བ་ལ། །
གཏིང་མི་ཚུགས་པའི་ཤེས་རབ་གྱར་པོ་དང་། །
གནད་མི་ཁྲོལ་བའི་ངག་འཆལ་རྡབ་རྡོབ་འདིས། །
ལེགས་ཉེས་འཁྲུན་ཐག་གང་ཡང་མི་ཆོད་པས། །
འགག་ལ་ཐུག་དུས་ཁྱེད་ཉིད་ཡང་ཡང་དྲན། །
ཕྱོགས་ཞེན་དུག་གི་བ་མོ་བཞད་པ་ལས། །
འཁོས་ཆུང་རེ་བའི་ལྗང་སྨྱུག་སད་ཀྱིས་བཅོམ། །
བློ་རྩ་གང་དུ་བཅོལ་དགོས་མི་ངེས་པར། །
གལ་ལ་ཐུག་དུས་ཁྱེད་ཉིད་ཡང་ཡང་དྲན། །
བསམ་བཞིན་ངན་སེམས་དུག་གི་སོ་ཁ་ནས། །
བདེན་པའི་བུ་ཆུང་ལྟོགས་གྲིར་ཤི་ན་ཡང་། །
ཡིན་ལུགས་ཤན་ཐང་ཙམ་ཡང་མི་འབྱེད་པར། །
སྡུག་ལ་ཐུག་དུས་ཁྱེད་ཉིད་ཡང་ཡང་དྲན། །
མི་སྡོད་ལོ་ཟླའི་ཕྲེང་རྡོག་རེ་རེ་ནས། །
དྲང་བདེན་འཚོ་བའི་དོན་དུ་ཟད་ན་ཡང་། །
མ་ཉེས་ལོག་པའི་སྦྱོར་བ་སྣ་མང་གིས། །
སྒྲོ་བཀུར་ཞྭ་མོས་གཡོགས་ན་ལྷག་ཏུ་དྲན། །
སྤྱིར་ན་སོ་སྐྱེས་བློ་ལ་ཡིད་རྟོན་ཅི། །
དགོས་སུ་ཕྱོགས་ལྷུང་བསམ་པ་གདོན་གྱིས་བཟུང་། །
གཅིག་གིས་བཤད་པ་གཞན་གྱིས་ཐན་དུ་བརྩི། །
གཟུ་བོའི་གྲོས་ཐག་ཆད་དུས་ལྷག་ཏུ་དྲན། །
ཡིད་ལ་གཞན་བསམ་ངག་ཏུ་གཞན་སྨྲ་བའི། །
སྐྱེ་བོ་གཡོ་ཅན་མཁན་གྱི་ལག་འཐིལ་ནས། །
བསྟན་པ་དབུགས་སྒང་བཞིན་དུ་སྒྲིལ་ན་ཡང་། །
བདེན་རྫུན་དཀར་ནག་སྒྲིབ་དུས་ལྷག་ཏུ་དྲན། །
ཕྲག་དོག་སྤྲིན་པ་ནག་པོའི་ཡང་སྟེང་ནས། །
འགྲན་སེམས་གཟའ་གཅན་བདུད་ཀྱི་མཆེ་བ་རུ། །
མ་འོངས་རེ་བའི་ཟླ་གཞོན་གཙིར་བ་ན། །
ཞེ་རྩ་གཏིང་ནས་སྐྱོ་བ་མཁྱེན་ལགས་སམ། །
ཁྱེད་ཀྱི་མ་བསླད་བསྟན་པའི་དབུ་རྨོག་དེ། །
བདག་འདྲས་སྲུང་བའི་དགོས་གལ་མ་མཆིས་ཡོད། །
བཅོས་མིན་བསམ་པས་རེ་བ་ཙམ་བྱས་པ། །
མ་ཉེས་ཁ་ཡོག་ཐེབ་པ་གཟིགས་ལགས་སམ། །
བསྟན་པའི་རྩ་བ་བཤད་དང་སྒྲུབ་པའི་སྡེ། །
བསྟན་པའི་ལྕགས་རི་དགེ་འདུན་ཕྱི་རབས་མི། །
གཅེས་ཤིང་སྲུང་བའི་དམ་པ་ལོགས་སུ་བཀར། །
ད་དུང་བསྟན་འཛིན་རློམ་པ་འགྲིག་ལགས་སམ། །
ཁ་ནས་རིས་མེད་ཅེས་ཏེ་ཀི་རིང་འདེབས། །
ཁོག་ནས་ཕྱོགས་རིས་བརྩད་ནས་ཡུལ་ཁམས་དཀྲུགས། །
ཁ་ཁོག་མི་མཚུངས་ཤར་ནུབ་བཅད་པ་འདི། །
རིས་མེད་བསྟན་པ་སྤེལ་ཚུལ་ཡིན་ནམ་ལགས། །
རང་གིས་ཆོས་སྤང་བྱས་ཀྱང་ཆོས་མཐུན་སྨྲ། །
གཞན་གྱིས་ཆོས་བཞིན་སྤྱད་ཀྱང་ལོག་པར་སྒྲོག །
ཞི་སྐྱག་གསེར་དུ་སྒོམ་པའི་འཐེན་འཁྱེར་འདི། །
ཆོས་ཀྱི་སྤྱོད་པར་མཐུན་ནམ་ཁྱེད་ཀྱིས་གཟིགས། །
ཆོས་ནོར་བསམ་པས་མི་འཛིན་ཁ་ནས་འཛིན། །
ཆོས་དོན་ཐོས་པས་མི་བཤད་ཧམ་པས་བཤད། །
ཆོས་ཀྱི་བརྒྱུད་པ་མི་དགོས་ཆོས་སྟོན་པ། །
ཆོས་དང་འགྲིག་གམ་ཁྱེད་ཀྱིས་ཡང་ཡང་གཟིགས། །
རང་གི་ཕ་མེས་ལོ་རྒྱུས་མེ་ལོང་ངོས། །
ལྦ་ལེར་འཆར་བའི་བདེན་དོན་ཡིག་འབྲུ་དེ། །
རང་འདོད་ཁ་ཆུ་ཆར་གྱིས་བསུབ་པ་འདི། །
ལུགས་དང་འགྲིག་གམ་ཁྱེད་ཀྱིས་ཡང་ཡང་གཟིགས། །
ནམ་ཞིག་རང་སེམས་གདོན་གྱིས་བཟུང་འདྲ་བའི། །
ཚུལ་མིན་ཡིད་ཅན་འགྲོ་བ་ང་ཅག་གིས། །
ཕན་ཚུན་གཅིག་གིས་གཅིག་ལ་བསམ་ཤེས་ཀྱིས། །
དྲིན་བཟོའི་འདུན་མ་འཁྲུང་བའི་བྱིན་རླབས་སྩོལ། །
ད་ནི་ཡིད་གདུང་མཆིན་པའི་བར་གསེང་ནས། །
གཉོམ་ཆུང་ངག་གི་རྒྱུད་སྐུད་རལ་བོ་དེར། །
དབང་མེད་སོར་མོས་རེག་ཙམ་བྱེད་པ་ལས། །
ཐབས་ཟད་གཞོན་ནུ་བདག་གིས་ཅི་ཞིག་ནུས། །
རྟོག་འཆར་བན་མ་བུན་གྱི་སྣེ་མོ་ནས། །
གློ་བུར་རྡོལ་བའི་ཚོར་བའི་སྨུག་ཞག་འདི། །
དབྱངས་གསལ་ངག་ལ་འཁྲུངས་པའི་ཨ་སྐྱོ་དེས། །
སྐད་ཅིག་ཤོག་ངོར་བརྡལ་བ་འདི་ག་ལགས། །
ཡིད་ངོས་སུ་གློག་འཁྱུག་པ་ལྟ་བུའི་འཆར་རྟོག་སྐད་ཅིག་སྐད་ཅིག་མ་དེ་དག་ཀྱང་ཤོག་ངོས་སུ་ཇི་བཞིན་དྲངས་པ་ལ་སྨྱུ་གུའི་རྩལ་ཅུང་ཟད་རྫོགས་པའི་ངག་རིག་སྨྲ་བའི་གྲལ་མཐའ་བ། བཏགས་མིང་ལ་འབར་བློ་དཀར་ཞེས་འབོད་པ་གང་དེས་ས་སྲོད་ཅིག་ལ་མྱུར་སྟབས་ཀྱིས་སྦྱར་བའོ། །
ཆིག་ལབ།
གྲོལ། མངོན་པ་གོང་མ།
ཅ་ཅོ་མེད་པར་བྱ་ཁྱུ་མཁའ་མཐར་འཕུར།།
ཉི་མ་སེར་པོས་ནུབ་ཀྱི་གངས་རི་བརྒལ།།
ས་སྲོས་ཉེ་བའི་གཟུགས་མེད་སྣང་བ་འཆར།།
བདག་ནི་ཉིན་ཞག་ཉི་ཤུ་རྩ་བཞིའི་རིང་།།
སྐྱོ་བའི་གཞས་ཆུང་ཉན་བཞིན་གཅིག་པུར་ལུས།།
སྒེའུ་ཁུང་ཕྱི་རོལ་འོད་ནི་རབ་རིབ་འཆར།།
གནམ་གྱི་འབྲུག་སྒྲ་ལྡིར་བ་རྒྱུན་མི་ཆད།།
བྲེད་པའི་བྱི་ལ་ང་དང་ཉེ་བར་བཅར།།
དགུན་ཁ་མིན་ཡང་སྟོན་རླུང་གྲང་སི་སི།།
སྒོ་དང་སྒེའུ་ཁུང་སྲུབ་ལས་ལྡང་བཞིན་འདུག།
ཚོར་བའི་གཙང་བོ་བྲུག་པས་ཡིན་ནམ་ཅི།།
འཁྲུལ་སྣང་མིན་པའི་གཏམ་རྒྱུད་རྫོཊ་པའི་རྗེས།།
མཚན་མོའི་སྨག་ནི་ཅི་འདྲའི་ནག་པ་ལ།།
སྔོན་ཆད་མི་འདྲ་སྣང་བ་འཇིགས་ཡེར་རེ།།
ཆང་མ་བཟི་ཡང་སྣང་བ་བན་བུ་གྱུར།།
གཉིད་དུ་ཡུར་རྗེས་རྨི་ལམ་འཁྲུག་དགོས་བྱུང་།།
རྨི་ལམ་ནང་དུ་མེ་ཏོག་རྙིད་པ་རྨིས།།
དེ་ཙམ་མིན་པར་སླར་ཞལ་མཇལ་བ་རྨིས།།
དགའ་འམ་སྐྱོ་འམ་འདྲི་ཚིག་མི་བཏོན་རོགས།།
ད་ལྟ་ངའི་ཚོར་སྟོང་པའི་གཟུགས་ལགས་སོ།།
དབེན་པའི་རི་ལ་འདུན་པ་ཤོར་བ།
ལུང་རིགས། ཕར་ཕྱིན་འོག་མ།
བཀའ་གདམས་དམ་པ་གོང་མའི་གདན་ས་སྟེ། །
བསམ་གཏན་སྐྱོན་དང་བྲལ་བའི་དབེན་པའི་རི། །
ཆོས་བརྒྱད་རྣམ་རྟོག་འགོག་པའི་བཙན་རྫོང་ཞིག།
འཇའ་ལུས་ཆོས་སྐུ་བགྲོད་པའི་གུར་ཁང་ཡིན། །
བྱིན་རླབས་ཆོས་ཀྱི་དྲི་བསུང་ཐུལ་བའི་ཡུལ། །
མཛའ་བའི་གྲོགས་སུ་ཉམས་ཆུང་རླུང་གི་སྲོག།
སྐྱིད་པའི་འཁོར་ཡུག་རི་ཆུ་ནག་གསུམ་འཛོམས། །
གཡོ་མེད་ཏིང་འཛིན་འཕེལ་བའི་གནས་དེ་སྐྱིད། །
བསིལ་རླུང་འཇམ་མོ་རི་སྐྱེས་གསེབ་ནས་ལྡིང་། །
འདབ་ཆགས་ཕོ་མོ་ལྷ་ལམ་ཡངས་པོར་རྒྱུ། །
ཕན་ཚུན་གཅིག་གྲོགས་གཅིག་གིས་འཚོ་བ་བཙལ། །
ཕྱི་ཡི་འདུ་འཛི་བྲལ་བའི་གནས་དེ་སྐྱིད། །
བཙན་པོའི་ཤུགས་དང་རྒྱུ་ཡིས་བསླུ་ཁྲིད་མེད། །
དཔོན་པོའི་འདུ་འགོད་གཡོག་པོའི་ངུ་ལབ་བྲལ། །
རང་སེམས་བག་ཡངས་སྟེར་བའི་དབེན་པའི་རི། །
མཐོན་པོར་ངོ་སྲུང་མི་དགོས་གནས་དེ་སྐྱིད། །
རྒྱུ་དང་འབྱོར་བ་སྒྲུབ་པའི་བྲེལ་ཟིང་མེད། །
གཉེན་དང་དགའ་མཛའ་སྐྱོང་བའི་དཀའ་སྡུག་བྲལ། །
ཆོས་ཕུག་སྤྲང་ལ་གཏད་པའི་རྣལ་འབྱོར་ས། །
ནང་གི་ཉམས་རྟོགས་འཕེལ་བའི་གནས་དེ་སྐྱིད། །
ཕྱི་རོལ་ཚོགས་དྲུག་ཡུལ་ལ་ཞེན་པ་བཀག།
ནང་དུ་ཆགས་སྡང་འདུ་འཛི་གཏང་དུ་སྙོམས། །
ཚོགས་བསགས་སྒྲིབ་པ་སྦྱངས་ལ་ངང་གིས་འཇུག།
ཤུགས་ཀྱིས་དགེ་སྦྱོར་འཕེལ་བའི་གནས་དེ་སྐྱིད། །
མཛེས་པའི་ཕ་ཡུལ་རྒྱབ་ཀྱི་ཕྱོགས་སུ་བཞག།
བརྩེ་བའི་ཕ་མ་རྒྱང་ཐག་རིང་དུ་བསྲིང་། །
བདག་ཉིད་གཅིག་པུ་དབེན་པའི་རི་ལ་ཕྱིན། །
སྒྲུབ་པའི་ཁེར་ཚུགས་སྐྱོང་བའི་གནས་དེ་སྐྱིད།
འདྲིས་པའི་མི་དང་ཞེ་འགྲས་འགྲོ་བ་ཉུང་། །
རྡོ་རྗེའི་སྤུན་དང་དམ་ཚིག་ཉམས་ཆག་དཀོན། །
སྙིང་རྗེའི་སེམས་ཀྱིས་འགྲོ་ཀུན་བརྩེ་བའི་སྐྱངས། །
ལྷན་སྐྱེས་ཡེ་ཤེས་སྐྱེ་བའི་གནས་དེ་སྐྱིད། །
རང་སེམས་བླ་མའི་ཐུགས་དང་དབྱེར་མེད་འདྲེས། །
མང་དུ་ཐོས་ཤིང་བསམ་པས་སྒྲོ་འདོགས་བཅད། །
རིམ་གཉིས་ཟབ་མོའི་མངོན་རྟོགས་འཕེལ་བའི་གནས། །
ཉམས་དགའ་ནེའུ་གསིང་ཚལ་ལ་ཡིད་འདི་སྨོན། །
བླ་མ་སངས་རྒྱས་སྤྱི་བོའི་གཙུག་ཏུ་སྒོམ། །
མདོ་སྔགས་ཆོས་དང་ཡིད་ནི་ཅི་འདྲེས་བྱེད། །
ལུས་ཀྱི་སྒྲིབ་སྦྱངས་ངག་གིས་བཟླས་བརྗོད་འབད། །
དུས་ཀུན་དོན་ཡོད་འདའ་བའི་གནས་དེ་སྐྱིད། །
“རྣམ་གཡེང་ལས་དང་འདུ་འཛིའི་གྲོགས་མང་དང་། །
ཆགས་སྡང་ཡུལ་ལས་རིང་དུ་སོང་བས་ན། །
དབེན་པའི་གནས་སུ་དམ་ཆོས་ཁོ་ན་ལས། །
བདག་ལ་བསམ་པར་བྱ་བ་ཅི་ཞིག་ཡོད། །”
ཅེས་རྫོང་སར་ཁམས་བྱེ་ལྔ་རིག་ཐུབ་བསྟན་སློབ་གླིང་ནས་བཙུན་གཟུགས་པ་ཡེ་ཤེས་ཆོས་འགྲུབ་ཀྱིས་བྲིས།
“ ཚིག་རྐང་གཅིག་དཔལ་སྤྲུལ་རིན་པོ་ཆེའི་གསུང་རྩོམ་ལས་བཤུས།
སེམས་ཀྱི་ཞུ་མཆིད།
ཁམས་འོད་གསལ། མངོན་པ་འོག་མ།
ཚོར་བ་བཙན་རུང་མ་འགག་འགག་མེད་གྱུར། །
ཚོར་བའི་གཞུང་ནས་མཇལ་བར་བྲེལ་བས་ཟིན། །
ཚོར་ཤེས་རྟ་ཕོ་ལས་ཀྱི་ལམ་ཁར་རྒྱུག །
ཚོར་འདུ་རིང་མོ་གཏིང་མཐའི་ནང་དུ་འཚང་། །
ཚོར་བ་གསོན་པོས་ཉིན་ཞག་མཐུད་དེ་སྒུག །
ཚོར་བའི་རྨི་ལམ་མངོན་འགྱུར་བྱུང་བས་སྤྲོ། །
ཚོར་རླབས་འཕྱོ་སྟེ་འདུག་བཟོད་མེད་པ་འདི། །
ཚོར་བྱུང་སྨིན་ལ་རེ་ཁཱའི་མདངས་བཞིན་དུ། །
ཚོར་ངད་ཆེ་བའི་བདག་གི་ལས་དབང་ཡང་། །
ཚོར་བ་སྐྱོ་མཐར་སླར་ཡང་དགའ་རུ་བཅུག །
ཚོར་ཤེས་ཟིན་པའི་ཡི་གེའི་ནགས་ཚལ་ནས། །
ཚོར་ཉམས་དེད་པའི་ཁྱེད་རང་མཇལ་བ་ནི། །
ཚོར་ཕུང་ཇི་སྙེད་ང་ཡི་ལས་སྐལ་བསམ། །
ཚོར་བས་ཕྱུག་ལ་ཚོར་བ་སྟེར་མཁན་པ། །
ཚོར་བའི་གསེང་ནས་ཡུན་རིང་མཇལ་བར་ཤོག །
ཚོར་སྐྱེན་སྩོལ་ལ་གཏན་དུ་འབྲལ་མེད་སྨོན། །
2024 11 19 གྲྭ་བཙུན་སྙན་ངག་པ་རོང་བོ་དགེ་འདུན་ལྷུན་འགྲུབ་ཀྱི་སྙན་ངག་གསར་པ་ཞིག་བཀླགས་མཐར་བྲིས།
འཇིག་རྟེན་དབྱངས་སུ་སྦྲུམ་པ།
འཇིག་རྟེན་དབྱངས་སུ་སྦྲུམ་པ།
བཙན་མྱི་སད། ཤེར་ཕྱིན་འོག་མ།
སྣ་མང་ཤིག་ཤིག་འཇིག་རྟེན་འཁོར་བ་ང་དང་དབྱངས་ཀྱི་ལས་སྐལ་ཡིན། །
གཟོད་མའི་བ་ཆགས་མཐུག་ལ་བཙན་རུང་ང་དང་དབྱངས་ཀྱི་ལོངས་སྤྱོད་ཡིན། །
གཞི་གསུམ་འཛིན་པའི་ལྟ་བ་རྒོད་ཀྱང་ང་དང་དབྱངས་ཀྱི་ལམ་ལུགས་ཡིན། །
མ་བོས་ལེ་ལོའི་རླུང་བུ་གཡུག་མོད་ང་དང་དབྱངས་ཀྱི་འཚོ་བ་ཡིན། །
འཇིག་རྟེན་དབྱངས་སུ་སྦྲུམ་པའི་ལོ་ཟླ་རྟོག་པའི་གྲུ་ཁ་དར་ཆ་ཡིན། །
དར་ཆར་གང་ཕྱོགས་མི་གཤིས་རྒྱུ་ཡང་འཇིག་རྟེན་དབྱངས་སུ་སྦྲུམ་ནི་ཡིན། །
འཇིག་རྟེན་དབྱངས་སུ་སྦྲུམ་སྟངས་རེ་རེས་དགའ་སྐྱོའི་ན་བུན་འགུགས་པ་ཡིན། །
བསམ་གཞིགས་ཁྲི་ཚོ་གནས་བབ་དེ་ནས་འཇིག་རྟེན་དབྱངས་སུ་སྦྲུམ་ནི་ཡིན། །
དབྱངས་ནི་མི་གཅིག་འགྱུར་ཁུགས་སྟོང་ཡོད་དགའ་སྐྱོ་སྣང་བའི་གཞི་རྩ་ཡིན། །
དབྱངས་ནི་ལྷ་ཡི་ངོ་མཚར་གྱིས་སྤུད་ཚངས་ཆེ་བུ་མོའི་གདངས་སྙན་ཡིན། །
དབྱངས་ནི་གྲོགས་ཀྱི་མཛའ་བརྩེ་དྭངས་མ་ཞིམ་མངར་འོ་ཆུ་ལེགས་ཆ་ཡིན། །
དབྱངས་ནི་ཨ་མའི་བྱམས་བརྩེ་ཟླ་བ་ཆ་ཤས་ཀུན་མངའ་རང་གཟུགས་ཡིན། །
འཇིག་རྟེན་སྒྱུ་མའི་གར་སྟེགས་ཀློང་ནས་ལྡེམ་མྱུར་བྲོ་དང་སྙན་པའི་དབྱངས། །
འཇིག་རྟེན་མཛེས་པ་གཅིག་ཏུ་བརྫངས་ཏེ་ཉམས་དགུ་རྫོགས་པའི་གྲེ་འགྱུར་དབྱངས། །
འཇིག་རྟེན་འཁོར་བའི་ནགས་ཚལ་བརྒལ་ཏེ་ཞི་བའི་རྒྱལ་སར་འགྱིང་པའི་དབྱངས། །
འཇིག་རྟེན་སྣང་མང་རང་བཞིན་ཡོད་དོར་མཛེས་བྱེད་བརྩེ་བ་དགུ་འགྱུར་དབྱངས། །
འཇིག་རྟེན་དབྱངས་ལཊ་དབྱངས་ནི་དགེ་ལེགས་འོད་སྟོང་འབར་བའི་སྲིད་ཞིའི་དབྱངས། །
འཇིག་རྟེན་དབྱངས་དངོས་དབྱངས་ནི་རྣ་དབང་བདེ་དགའ་དཔལ་སྦྱིན་ངོམས་མེ་དབྱངས། །
འཇིག་རྟེན་དབྱངས་ཁྱབ་དབྱངས་ཀྱི་གདངས་སྙན་ངག་རིག་ཁྲི་ཚོའི་ཟླ་མེད་དབྱངས། །
འཇིག་རྟེན་དབྱངས་ལ་དབྱངས་ཀྱི་ཉམས་ཡོད་དྲི་ཟའི་བུ་མོའི་མགྲིན་པ་དབྱངས། །
འཇིག་རྟེན་དབྱངས་ཀྱི་གར་དགུ་འཛོམས་ཡོད་ཚད་མེད་གདངས་སྙན་ངག་རིག་དབྱངས། །
འཇིག་རྟེན་དབྱངས་དངོས་སྲིད་ཞིའི་དགེ་ལེགས་འོད་ཀྱི་སྒྲོམ་བུའི་སྙན་འཇེབས་དབྱངས། །
འཇིག་རྟེན་དབྱངས་རྟོགས་རྟེན་འབྲེལ་ཚོཊ་གླུ་འགཊ་མེད་མཁའ་འགྲོ་དགྱེས་པའི་དབྱངས། །
འཇིག་རྟེན་དབྱངས་ལགས་སྐྱོ་གདུང་ན་བུན་རྒྱང་དུ་བསྐྲད་པ་དགེ་བའི་དབྱངས། །
གདམ་གསེས།
རྣལ། མངོན་པ་འོག་མ།
འཁོར་བར་ཕུལ་བའི་མེ་ཏོག་གི་ཚོམས་ལ།
སྐྱེ་འཆིའི་མཆོད་ཆང་གི་ཁ་ཕུད་བཏེགས་ཡོད།
དལ་གྱིས་བཞེས་རོགས་གནོངས་དང་།
ང་ཡི་སྙིང་གཏམ་ཡུན་གྱིས་ཞུ་ཆོག
སྡུག་བསྔལ་ལ་བསྙལ་བའི་ཚེ་ཡི་ཟུངས་ཁྲག
ས་སྲོད་ཅིག་གི་ཚབ་ཏུ་ཕུལ་ཡོད།
དལ་མོར་གཟིགས་རོགས་གནོངས་དང་།
གོས་འཇམ་ཚལ་དཀར་གྱི་ཚབ་ཏུ་ཕུལ་ནས་འོང་ཨང་།
སྙིང་རླུང་མཚོ་ཁར་འཁོར་བའི་གཏམ་རྒྱུད་ལ།
བྱུ་རུའི་ཕྲ་རྒྱན་གྱི་རིག་བྱེད་བཏེགས་ནས་ཡོད།
ངས་འདི་ལྟར་མི་འདོད་དེ།
དྲན་པ་ལས་ཀྱི་བསྐོས་ཐང་རེད།
རྩྭ་སྐྱ་རླུང་ལ་དབང་བའི་ཆོས་ཉིད་ལ།
མུན་འོབས་སུ་ལྷུང་བའི་སྐར་ཕྲན་རྒྱན་ཡོད།
ང་འདི་ལ་མི་དགའ་སྟེ།
འཆི་བས་ང་ལ་གནང་བའི་གདམས་གསེས་རེད།
ཨ་མ་ལྷ་མོ།
ཕུང་གསུམ་པ། ཕར་ཕྱིན་གོང་མ།
ལྷ་མོ་མཛེས་པའི་རྒྱན་གྱིས་མ་སྤྲས། །
དུས་ཀྱི་སྒྱུ་མའི་ཚོན་རྩིས་མ་བཅིངས། །
ལྷད་མེད་བརྩེ་བའི་ཉམས་ཀྱི་ཕྱུག་པའི། །
ཨ་མ་ལྷ་མོ་དྲིན་གྱི་བདག་ཡིན། །
ལས་འབྲས་བྱུ་རུ་སྐེ་ལ་བཏགས་ཤིང་། །
ཁྲེལ་གཞུང་སྐེད་འཆིང་དམ་དུ་བསྡམ་ནས། །
དམར་པོའི་མཁུར་ལ་འཛུམ་གྱི་གང་བའི། །
མི་ཡུལ་ལྷ་མོ་དྲིན་གྱི་བདག་ཡིན། །
དགེ་སྡིག་མིག་འབྲས་དཀར་ནག་གསལ་ཞིང་། །
བདུད་རྩིའི་ཤ་ཡིས་མྱོས་བུམ་རྒྱས་པ། །
ཁ་ན་མར་རྩམ་དྲི་བསུང་འཐུལ་བའི། །
བོད་ཀྱི་ཨ་མ་དྲིན་གྱི་བདག་ཡིན། །
སྒོ་ཁའི་འབྲི་མོའི་རྨིག་རྗེས་འབྲང་ཞིང་། །
ཤུག་པའི་བཞོ་ཟེའུ་འོ་མས་ལྟེམ་བཞིན། །
ཁྱིམ་གྱི་མེ་ཐབ་དྲོད་ཀྱིས་སྐྱོངས་མཁན། །
འབྲོག་པའི་ཨ་མ་དྲིན་གྱི་བདག་ཡིན། །
ཚེ་རབས་ལས་ཀྱི་ལྷ་ཡི་མདུན་ན། །
གཙང་མའི་མཆོད་མེ་ཚེ་འབར་སྒྲོན་ནས། །
ཡིད་ཆེས་བསླུ་མེད་སྐྱབས་འཇུག་ཞུ་བའི། །
གོ་ཁུག་ཨ་མ་དྲིན་གྱི་བདག་ཡིན། །
སྐྱིད་སྡུག་རྩབ་མའི་འཁོར་བའི་ནང་དུ། །
ཡལ་མེད་འཛུམ་གྱི་སོ་ཕྲེང་སྟོན་ཞོར། །
སྦྲ་ནག་གྲུ་བཞིའི་མཐའ་ནས་སྲུང་བའི། །
འཚོ་བའི་མ་ཡུམ་དྲིན་གྱི་བདག་ཡིན། །
མི་དགེའི་སྐྲ་ལོ་རྒྱབ་ཏུ་འཕྱངས་ཤིང་། །
ངོ་ཚ་བླ་གཡུ་བྲང་ལ་འཕྱོ་བའི། །
ལྷག་བསམ་འུར་རྡོ་ཀླད་ནས་གཡུགས་མཁན། །
བོད་ཀྱི་མཛངས་མ་དྲིན་གྱི་བདག་ཡིན། །
རྫུན་གྱི་བཅོས་པའི་འཛུམ་བག་མ་གོས། །
གཡོ་སྒྱུ་འཆམ་པའི་སྐྱ་རྫས་མ་བྱུགས། །
ལྷད་མེད་རང་བཞིན་སྐྱེས་གཟུགས་འབར་བའི། །
མཐོ་སྒང་ཨ་མ་དྲིན་གྱི་བདག་ཡིན། །
ཕྱི་ཐག་གསེར་གྱི་སྐུད་པ་མ་ལྷོད། །
ཁ་ཕོར་རྣ་བའི་རྒྱན་ཆ་མ་བོར། །
ཞེ་འདང་རི་མོ་ཆུ་ལས་གསལ་བའི། །
རང་ཚུགས་ཅན་མ་དྲིན་གྱི་བདག་ཡིན། །
ཕམ་ཉེས་རི་བོ་ཕྲག་དུ་ཁུར་ཞིང་། །
སྡུག་གི་མིག་ཆུ་ལག་པས་འཕྱི་བཞིན། །
སྐྱོ་ངལ་རིང་མོའི་སྣམ་བུ་འཐག་མཁན། །
སྙིང་རུས་ཅན་མ་དྲིན་གྱི་བདག་ཡིན། །
ཁྱིམ་གྱི་འཚོ་བའི་ཁ་ཟས་དོན་དུ། །
ཉིན་ཡང་མཚན་གྱི་ཆ་བཞིན་སྙོམས་ཤིང་། །
བུ་ལ་སློབ་གཉེར་མཐུན་རྐྱེན་སྦྱོར་མཁན། །
འཚོ་བའི་སྐྱོར་མ་དྲིན་གྱི་བདག་ཡིན། །
ཐབས་ཀྱི་དབུ་སྐྲ་སིལ་མ་སླས་ཤིང་། །
དྲན་བསྐུལ་ཚིག་གི་ཡང་ཡང་འདེགས་ནས། །
མི་གཤིས་ལྕགས་ཀྱི་ཐེམ་སྐས་འཛུགས་མཁན། །
སློབ་གསོའི་དབང་མོ་དྲིན་གྱི་བདག་ཡིན། །
འཕྱ་སྨོད་ཚིག་གི་ཆར་ཆུས་མ་ཁོག །
མྱི་ཁ་རླུང་གི་སྤུ་གྲིར་མ་འཇིགས། །
སྤོབས་པའི་དར་ལྕོག་ལ་རྩེར་སྒྲོན་མཁན། །
གངས་རི་ཨ་མ་དྲིན་གྱི་བདག་ཡིན། །
ངའི་ཕ་ཡུལ།
ཞོགས་སད། ཕར་ཕྱིན་གོང་མ།
སེམས་ཀྱི་ཟུང་ཁྲག་གིས་བསོས་པའི་སྙིང་ན་ས་ཞིག་ནས་ཁྱེད་ཀྱི་ཞལ་རིས་རྙེད་ཅིང་
ཅི་ཡང་མེད་པའི་ནམ་མཁའ་སྟོང་པ་ནས
ཡལ་བ་མེད་པའི་གནའ་གཏམ་འཕྲོ་ཞིང་འཚོ་བ་རོལ
དེ་ནི་ངའི་ཕ་ཡུལ་ཞིག་ཟེར་ལ
དེ་ལ་ངས་སྙིང་ཉེར་ཡང་འབོད
ཟླ་འོད་མེད་པའི་མཚན་ལམ་རིང་མོའི་ལག་མཐིལ་ན
དགའ་སྤྱོར་ཆགས་སྡང་གི་རྨི་ལམ་ནང་བཞིན་ཡལ་བ་མེད་པར་ཁྱེད་རང་ཡང་ཡང་གསལ་ཞིང་
ཁྱོད་དང་ང་ཡི་ལེ་བ་དང་ལེ་བའི་བར་སྟོང་ཇི་ཙམ་རིང་ཡང་དེ་ཙམ་དྲན་ཞིང་དེ་ཙམ་དགའ
དེ་ནི་ཚེ་སྔོན་གྱི་ལས་འབྲས་དེས
འུ་གཉིས་ཀྱི་མཇལ་ཁ་དང་རྨི་ལམ་རིང་སོང་བས
ལས་ཀྱི་བསྐོས་པའི་ལམ་ཁ་ནས་ངའི་སེམས་པ་གཡེང་དུ་ཁྲིད་དེ
མཚམས་རེ་ལ་སྟོན་ཁ་ནང་བཞིན་སེམས་སྐྱོ་ཞིང་
མཚམས་རེ་ལ་ཉི་ཟླ་ནང་བཞིན་དྲོད་ཀྱིས་བསྐྱོངས
ལས་སྣང་གི་འཇིག་རྟེན་འདི་ཇི་ཙམ་འགྱུར་ཡང་
ལས་མཐུན་གྱི་ཕ་ཡུལ་འདི་རྙེད་པ་ནས་བཟུང་
བདག་གི་སེམས་པ་རྒོད་པོ་རླུང་ལ་སྐུར་ནས་ཁྱེད་རང་དལ་་གྱིས་བསྐྱོད
དེ་ནི་མཛེས་སྡུག་ལྡན་པའི་ངའི་ཕ་ཡུལ་ཟེར
རྒྱང་ལ་ཅེར་ཡང་ཁྱེད་ལ་འཁོར། ངའི་མ་ཡུམ་སློབ་གླིང་།
དཔལ་གངས་དཀྱིལ། དབུ་མ་བར་མ།
རྒྱང་ལ་ཅེར་ཏེ་རྒྱང་ལ་འགྲོ་འདོད་ཅིག་སྐྱེ་ཡང་། །
ཡུལ་ལ་དམིགས་ནས་ཡུལ་གྱི་སྡེ་ཁ་དེ་གཤགས་ཀྱང་། །
དྲན་པའི་སྙིང་དང་ཚོར་བའི་གཞི་མ་ཡི་སློབ་གླིང་། །
ལོ་ཟླ་མི་འགོར་ཁྱེད་ཀྱི་ཉེ་འདབས་སུ་འཁོར་ཡོང་། །
ལུས་དང་གྲིབ་མ་རྒྱང་རིང་རྒྱང་རིང་ལ་ཕྱོགས་ཀྱང་། །
གློ་དང་མཆིན་པའི་འཕར་ལྡིང་འཇགས་ས་དེ་མིན་ཡང་། །
སེམས་དང་བསམ་པ་འཁོར་ས་ཁྱེད་ཉིད་ལས་གང་ཞིག །
མིག་དང་རྫི་མ་གཡོ་ས་ཁྱེད་ཉིད་ལས་གང་ལགས། །
འགྲུལ་བཞུད་རླངས་འཁོར་ང་དང་ཉེ་ས་རུ་བཅར་ཏེ། །
རྐང་པའི་ལྷམ་སྒྲོག་ལག་པའི་སོར་མོ་ཡིས་མདུད་ཀྱང་། །
ལེ་དབར་སྟོང་གི་ཕ་རོལ་ཆས་གྲབས་སུ་རློམ་ཡང་། །
དྲན་པའི་མེ་ལོང་ད་དུང་ཁྱེད་ཕྱོགས་ལ་འཁོར་ཡོད། །
བླ་མའི་ཕྱག་དར་སློབ་མའི་འགུལ་རྒྱན་དུ་སྒྲོན་ཡང་། །
མཆེད་པའི་གྲོགས་ཀྱིས་གྱེས་བྲལ་ལག་བརྡ་དེ་བཏང་ཡང་། །
སླར་ཡང་འཛོམས་པའི་རེ་བའི་འཛུམ་མདངས་ཀྱི་ཁྲོད་དུ། །
དུང་བ་ཞིག་གིས་སློབ་གླིང་གཟི་བརྗིད་དེ་མཐོང་བྱུང་། །
དྲན་པའི་ངོས་ལ་སེམས་ཀྱི་ཚོར་བ་དེ་སྐྱོམ་ཞིང་། །
སོར་མོའི་རྩེ་ལས་ཚིག་གི་ཁྱུ་ཚོགས་དེ་བབས་པས། །
སླར་ཡང་འཛོམས་པའི་རེ་བ་མཆོག་གསུམ་ལ་བཅོལ་ཏེ། །
དཔལ་ལྡན་བླ་མའི་ཐུགས་དགོངས་རྫོགས་ཕྱིར་དུ་བསྔོའོ། །
ས་སྲོད་ཀྱི་སྣང་བ།
གྲི། མངོན་པ་འོག་མ།
བདག་གི་མིག་ཟུང་རྒྱང་དུ་ཡང་ཡང་ལྟས།།
ནགས་ཚལ་འགུལ་ཞིང་ཁ་བའི་རི་ཀླུང་གཡོག།
སྤྲིན་དང་སྨུག་པ་རི་བོ་འཁྱུད་པ་སོགས།།
ས་སྲོད་ཉི་མས་སུ་ཡི་དྲན་གདུང་ཁུར།།
ཁུ་སིམ་ཁྲོད་ནས་སྙན་པའི་དབྱངས་ལ་ཆཊ།།
དྲན་པའི་ན་ཟུག་སེམས་ཀྱི་རྨ་ཁ་སློང་།།
གཅིག་པུར་བསྡད་དེ་ལག་པས་བྲང་ཁ་མནན།།
གློ་བུར་ཅི་ཞིག་མི་རྟག་ཡང་ཡང་སྒོམ།།
གཤིས་ཀྱི་གནང་བའི་བདག་གི་ཕྱི་ཚུལ་ལས།།
གཏམ་གྱིས་སྦྱོར་བས་གྲོགས་ལ་གཙེས་ན་ཡང་།།
སེམས་ཀྱི་ཕག་ན་བློ་དཀར་གཞུང་དྲང་ཞིག།
རིང་ནས་འདྲིས་ཚེ་སུ་ཡིས་རྟོགས་ཀྱང་སྲིད།།
གཞོན་པའི་སྣང་བ་དགུང་གི་ཉི་ཟླ་བཞིན།།
སེམས་ཀྱི་གཏད་སོ་སྒྱུ་མའི་ཕོ་བྲང་ལྟར།།
ན་བུན་འཁྲིགས་ཤིང་རི་དྭགས་རྒྱུ་བ་ཡི།།
གནས་དེ་བདག་གི་ཚེ་འཇུག་སྨོན་པ་འདྲ།།
སེམས་ཀྱི་གཤིས་ལུགས་རང་གིས་མ་རྙེད་ན།།
སྐྱོབ་པའི་ལྷ་ཞིག་ཕྱི་རོལ་མི་འདུག་པས།།
སྒོ་གསུམ་ཞི་བའི་ཐབས་ཞིག་འཕྲད་པ་ལ།།
ད་ནས་བདག་གིས་རང་ཉིད་ལྟ་བར་བྱ།།
རང་ཡུལ་གྱི་སྣང་བ།
བཞག་ཚ། ཕར་ཕྱིན་གོང་མ།
ཡིད་འོང་འཇའ་ཚོན་འཕྲོ་བའི་མཁའ་དབྱིངས་ཀྱི་ཚལ་ན།།
རྟག་བརྟན་གཡུང་དྲུང་འཁྱིལ་བའི་མཛེས་སྡུག་གི་ཁུད་ན།།
རང་ཡུལ་མཐོང་བ་ཀུན་སྨོན་སེམས་ངོགས་ལ་ཕེབས་དུས།།
དགའ་སྐྱིད་སྤྲོ་གསུམ་མཚར་སྡུག་ལོངས་སྤྱོད་ཀྱི་འཕེལ་བ།།
རྫོགས་ལྡན་ནོར་གཡང་ཆགས་པའི་རང་ཡུལ་གྱི་གཞུང་ན།།
བསོད་ནམས་དཔལ་དུ་འབར་བའི་དགེ་མཚན་གྱི་ཞིང་ན།།
མཛའ་བརྩེ་མཐུན་ལམ་རིང་མོ་རྟག་བརྟན་དུ་བཞུགས་པ།།
རང་ཡུལ་བཀའ་བཞིའི་ཡུལ་སྡེ་རྟག་བརྟན་དུ་སྐྱིད་དགོས།།
དྭངས་གཙང་མཛེས་སྡུག་སྤུད་པའི་རང་ཡུལ་གྱི་ལྗོངས་ན།།
གཡང་ཆགས་དངོས་གྲུབ་འབྱུང་བའི་རང་ཁྱིམ་གྱི་ནང་ན།།
མཛའ་མཐུན་བརྩེ་བ་ཟབ་མོ་རང་གཞན་ལ་དགོངས་བས།།
རང་ཅག་བདེ་སྐྱིད་ཉི་མ་མཁའ་དབྱིངས་སུ་གཟིགས་ཡོད།།
མེས་པོའི་ཕ་སྐད་གཙང་བའི་གངས་དཀར་གྱི་འདབས་ན།།
གསོལ་འདེབས་རྣམ་དག་འཐུ་པའི་སྨོན་འདུན་གྱི་ཚལ་ན།།
ཆུང་ནས་ཞེན་ཆགས་ལུས་པའི་རང་ཡུལ་གྱི་གཟུགས་རིས།།
མ་བརྗེད་སེམས་ཀྱི་ཟབ་སར་མཆོད་གནས་སུ་འགྱིང་ཡོད།།
ཁེར་ལབ།
ཁམས་པ་རག་སྨྱོན། ཤེར་ཕྱིན་བར་པ།
སྙེ་མའི་སྦུགས་ལྟ་བུའི་ང་རྒྱལ་གྱི་མགོ་བོ་ཡོངས་སུ་བྲེགས་ཏེ
ལོ་མང་བསྙལ་བའི་ནས་ཆང་གི་བཟི་ཁ་འཚོལ་གྱིན་པའི་ཆང་མ་དག་གིས
གསེར་གྱི་ཐིགས་པ་འདྲ་བའི་དུས་ཚོད་ཀྱི་ཐ་གུའི་སྣེ་རུ་དམ་དུ་འཇུས་པའི་ཟོལ་གྱིས
ས་སྲོད་ཀྱི་མཆོད་མེས་སྲེག་གིན་པའི་མཚམ་སྤྲིན་གྱི་མཛེས་པ་ལ་ཅེར་གྱིན
སང་ཞོགས་ཀྱི་སྐྱ་རེངས་བོར་བའི་གཏམ་རྒྱུད་འཁྱག་པོ་ཞིག་གི་རི་མོ་བྲིས
གདོས་བཅས་མིན་པའི་འཇའ་ཚོན་གྱི་བསླུ་བྲིད་ལྟ་བུའི་རྒྱང་རིང་གིས
ཡང་ན་མགོ་མཇུག་མེད་པའི་རྨི་ལམ་གྱི་ཕྱི་ནང་དུ་དོད་པའི་རི་མོ་དེའི་དབང་གིས
འབྱུང་འགྱུར་གྱི་ཁོར་ཡུག་དེའི་འོད་སྣང་ཡོད་ཚད་སྦྱིན་སྲེག་ཚར་འདུག་པས
བག་ཚ་དང་ཉམ་ང་མེད་པར་ཕྱི་དྲན་གྱི་མེ་ལོང་དུ་མཆོང་བའི་སེམས་ཉིད་སྨྱོན་པས
སྐྱོ་ཡུས་དང་དཀའ་སྡུག་གིས་ཁེངས་པའི་མཚན་མོ་ཁེར་རྐྱང་ཞིག་རྙེད་པར་གྱུར
ལྷ་སྒྲུང་ནང་གི་གངས་རི་ལྟར་ལག་ཏུ་ཁྱེར་ཏེ་འགྲོ་རྒྱུ་བྱུང་ན
དཔྱིད་རླུང་གིས་བདས་པའི་དྲོད་སྣང་ལྟར་རེ་བའི་མྱུ་གུ་རེ་བསྐྱེད་ཐུབ་ན
དཀའ་སྡུག་གིས་ཁེངས་པའི་མི་ཡུལ་གྱི་ཆོས་ཉིད་རྗེན་པར་མཐོང་ཤིང
ཚེ་སྲོག་གི་རོལ་དབྱངས་དཀྲོལ་ཀྱིན་བདེན་དོན་གྱི་སྣ་གླུ་ཐན་ཐུན་ལེན་མཁན
ས་ཆེན་ཡངས་ཤིང་མི་ཚོགས་མང་དྲགས་པས་ཁྱེད་རང་ཁོ་ན་ཡིན་མི་སྲིད་ཨང
ཚུལ་འཆོས ཚུལ་འཆོས
དཔལ་འབར རྒྱུད་སྡེ་འོག་མ
མིག་ཁོ་ན་མིན་པ་སེམས་ཀྱིས་ལྟོས་དང
ང་དང་ཁྱེད་ཀྱི་ཁ་ཐག་ཉེ་བའི
ཡང་ན
ཉེ་ཉེ་འདྲ་ལ་རིང་རིང་ཡང་འདྲ་བའི་འཇིག་རྟེན་འདི
བསམ་གཞིགས་སྣ་ཚོགས་ཀྱི་ནམ་མཁའ་དང
འཆའ་ཡན་སྣ་ཚོགས་ཀྱིས་བར་ཁྱམས་གང་བའི
འཇིག་རྟེན་འདི
འཇིག་རྟེན་འདི
ང་དང་ཁྱེད་ཀྱི་མཐོང་སྣང་གི་ཚུལ་འཆོས་དང
བརྩེ་བ་རྫུན་མའི་སྤྲོས་པ་རྒྱས་ས
ཚུ་འཆོས་མེད་ན་མི་ཆོག་གི་སྣང་བ་གིས
ཚུལ་འཆོས་ཀྱིས་ཡོད་ཚོད་ལ་བྱི་དོར་བྱས་སའི་སྣོད་ཆེན་པོ
ཚུལ་འཆོས་ལ བྱ་ལོག་མ་ཟེར
སྤྱོད་ལོག་མ་ཟེར
འཇིག་རྟེན་འདི་མ་གཞི་ནས་མཐོང་སྣང་དེས་རྒྱ་དང་རྙི་ཡིན་སོང་ཟེར
ཚུལ་འཆོས་ཀྱི་སྐུད་པ་ཆད་ན
འཇིག་རྟེན་འདིར་གྲགས་འགུལ་ཅི་ཡང་མེད་པས
ད་ནི་ཚུལ་འཆོས་ལ་གོམ་པར་གྱིས
ཚུལ་འཚོས་ལ་བསླབ་པར་གྱིས
ཚུལ་འཆོས་དང་ཉེར་བར་གནས་པར་གྱིས
ཚུལ་འཆོས་ཀྱི་གཏེར་སྒོ་ཡང་ཕྱེ་བར་གྱིས་ཟེར
ཡང
འཁྲབ་སྟོན་གྱི་སྐུ་འདྲ་ལ
ཚུལ་འཆོས་ཀྱི་གཟུངས་གཞུག་ཕུད་ན
བྱ་བ་གང་དེ་བདེ་ལེགས་རེད་ཟེར
དེས་ན
ཁྱེད་ཀྱང་ཚུལ་འཆོས་ལ་ཐིམ་པར་གྱིས་ཨང་ཟེར
དེ་བས་ཏེ
མཐོང་སྣང་རྫུན་མ་ལ་འཇིག་རྟེན་རྫུན་མས་ཁེངས་ཤིང
འཇིག་རྟེན་རྫུན་མ་ལ་ཚུལ་འཆོས་སྣ་ཚོགས་ཀྱིས་ཁྱབ་བོ
ཁ་བ་འབབ་བཞིན་འདུག
འཇམ་དབྱངས་སྦྱིན་པ། མངོན་པ་གོང་མ།
དོ་ནུབ། ཕྱི་རོལ་དུ་ཁ་བ་འབབ་བཞིན་འདུག
ངའི་སེམས་ཁམས་ཁ་བ་བཞིན་གྲང་།
འོན་ཀྱང་། ཁ་བ་ལྟ་བུའི་ཤོག་བུ་དཀར་དཀར་གྱི་ངོས་སུ།
བྱེའུ་རྗེས་ལྟ་བུ་སྣག་ཚ་ནག་པོ་ཞིག་གིས་ཡི་གེ་འབྲི་བཞིན་ཡོད།
ནམ་ཞིག་ལ། ཁ་བ་ཞུ་བའི་ཚེ། ངའི་ཡི་གེ་དེ་དག་ཀྱང་ཞུ་འགྲོའམ།
ངའི་འཚོ་བ་རྗེས་མེད་དུ་འགྱུར་ཨེ་འགྲོ། ཚོར་བ་ནི་གནས་སྐབས་ཙམ་ཡིན་ནམ།
འདུ་ཤེས་ཀྱང་ཨ་འཐས་སུ་གྲུབ་ཡོད་དམ། ཨ་ལ་ལ། ཨ་ལ་ལ།
ལོ་ངོ་མང་པོ་ཞིག་གི་རིང་ལ། ང་ནང་བསྟན་སློབ་གྲྭ་རུ་གནས་ཀྱང་།
ངའི་སེམས་ཁམས་ལ་དངོས་པོའི་བདེན་འཛིན་གྱིས་གདོན་ཞུགས།
ཕངས་པ་ལ། སྐྱོ་བ་ལ། ངའི་མི་ཚེ། ངའི་རེ་འདུན། ཡོད་ཚད་མི་རྟག་པ།
ཐུག་པ་ཞིག
ལོ་ངོ་སྟོང་ཕྲག་གི་ལོ་རྒྱུས་ལ་བདེན་དཔང་བྱས་ཏེ།
བོད་དང་རྒྱ། རྒྱ་དང་བོད།
བྱུང་མ་མྱོང་བའི་གནད་དོན་ཁག་ཅིག
བདེན་པ་ར་སྤྲད་པའི་ཐུག་པ་དེ་ཧ་ཅང་ཞིམ།
ཧུབ་གང་འཐུངས། དེ་ལ་བྲོ་རྫས་བརྒྱབས་མེད་པར་ཤེས།
ཡང་བསྐྱར་འཐུང་འདོད་སྐྱེས། ཐུག་པ་དེའི་ནང་།
ཕྱོགས་ཞེན་གྱི་བྲོ་བ་མེད། བདེན་པ་བདེན་རྐྱང་ཡིན།
དངོས་གནས། ཐུག་པ་དེ་ལྟ་བུའི་བརྒྱུད་རིམ་ཞིག
དྲང་པོ་དྲང་རྐྱང་གིས་བཀོལ་བར་ལས་སླ་མོ་ཞིག་མ་རེད།
ལོ་རྒྱུས། དངོས་བྱུང་། བརྒྱུད་རིམ། འཆར་གཞི། མི་ཚེ།
ཐམས་ཅད་ཧ་ཅང་སྙིང་ཉེ་བ་ཞིག་རེད།
ང་རྣམ་གཡེང་ཆེ་ལ་ལོ་ལེ་དེ་བས་ཆེ། འོན་ཀྱང་།
ཐུག་པ་དེ་ནི་དུས་ཡུན་ཐུང་ཐུང་ཞིག་ལ་ཆ་ཚང་འཐུངས་ཟིན།
བོད་རྒྱལ་ལོ་༢༡༥༡ལོའི་དགུན་ཟླ་འབྲིང་པོའི་ཡར་ངོའི་ཚེས་ལ་སྤོས་ལྡན་གྲོང་ནས།
བོད་བཙན་པོའི་རྣམ་ཤེས།
ཆར་ཞོད། མངོན་པ་འོག་མ།
གཙང་བོ་ལྷོད་ཀྱིས་བཞུར་བའི་འགྱུར་ཁུགས་དེ་ཡིས། །
བསམ་གཞིག་བརྒྱ་ཕྲག་ཅིག་གི་སེམས་པ་བྱུང་ན། །
གངས་ཀྱི་གྲང་ངར་འཐག་པའི་བཙན་པོ་བོད་ཀྱི། །
མེས་པོ་རལ་བ་ཅན་ཚོ་ཡིད་ལ་དྲན་འོང་། །
ལོ་རྒྱུས་དེབ་དཀར་སྟེང་གི་དཔའ་སྤོབས་མཐོང་ན། །
མེས་པོའི་ངག་རྒྱུན་ཁྲོད་ཀྱི་ཀི་སྒྲ་ཐོས་ན། །
སུམ་གཉིས་ས་ཡི་དཀྱིལ་འཁོར་དབང་དུ་བཟུང་བའི། །
སྲིན་པོ་གདོང་དམར་བོད་ཀྱི་དམག་དཔུང་དྲན་བྱུང་། །
ས་གཞི་རི་རབ་སྔངས་པའི་རྔམ་སྟབས་ཤིག་གིས། །
ལེ་དབར་ཁྲི་བརྒྱའི་དགྲ་དམག་ངོ་རྒོལ་འཕེར་བའི། །
རིགས་ཞེན་ཟུངས་ཁྲག་འཁོལ་བའི་དཔའ་བོ་དྲན་ན། །
འུ་ཅག་ཁ་རོག་གསོན་པའི་འདུན་པ་འདུག་གམ། །
གྲི་ཁས་ནམ་མཁའ་གཤག་པའི་ཆོད་སེམས་དེ་ཡིས། །
རྔོག་ནག་རླུང་གིས་བསྐྱོད་པའི་རྟུལ་ཕོད་དེ་ཡིས། །
ཕྱོགས་བཞིའི་རྒྱ་ཁྱོན་འཛིན་པའི་ཡབ་མེས་མཚོན་ན། །
ཁ་རྒྱག་ཁོག་སྟོང་ཡིན་པའི་ང་ཚོ་ཅི་རེད། །
མི་རྗེ་སྲོང་བཙན་སྒམ་པོའི་མཁྱེན་དཔྱོད་ཨེ་རྟོགས། །
བློན་ཆེན་ཐུ་མིའི་ཁྲག་གི་དབྱངས་གསལ་ཨེ་མཁྱེན། །
མ་གཞི་བསྐལ་བ་སྔོན་མའི་བཙན་པོའི་རྒྱབ་ཁབ། །
ད་ལྟར་དཀར་ནག་དེབ་ཐེའི་ཤོག་ལྷེ་ཨེ་རེད། །
ཐག་སྒྲ་རྣ་བར་གཟན་པའི་མེ་མདའི་འོག་ཏུ། །
དམར་པོ་སྲོག་གི་མཆོད་པ་མེ་ལ་བསྒྲོན་པའི། །
སྟོང་ལོ་བརྒྱད་ཀྱི་བཙན་མཁར་ལྷ་ས་དྲན་ན། །
སྙིང་གི་འཕར་རྩ་གནན་ནས་བསྡོད་དུ་ཚུགས་སམ། །
ངར་སྒྲས་གནམ་ས་བསྐྱོམས་པའི་སེངྒེ་གང་ཕེབས། །
རྭ་རྩེས་ལྷུན་པོ་བསྙིལ་བའི་འབྲོང་གཡག་གང་ཉུལ། །
ལྷུང་ལྷུང་འཚེས་སྐད་བསྒྲོགས་པའི་ཅང་ཤེས་གང་ཞོགས། །
མེས་པོའི་རྣམ་ཤེས་འཁོར་སའི་དུར་བྱང་གང་ལགས། །
གཡག་རོག་ཁུལ་རྩིད་ཐགས་པའི་སྦྲ་ནག་གང་རེད། །
དབྱངས་གསལ་འབྲི་ཀློག་འཚོལ་བའི་བོད་ཕྲུག་གང་རེད། །
གོང་བ་གཡང་ཤམ་ཅན་གྱི་བོད་ལྭ་གང་རེད། །
ཐུ་བྷོད་བཙན་པོ་གནས་སའི་གཞིས་ཁྱིམ་གང་རེད། །
ལྷ་མིན་འཕྲུལ་གྱིས་བཞེངས་པའི་ཕོ་བྲང་ལྟག་གི །
ཀྲང་ངེ་གནམ་ལ་ཟུག་པའི་ཏི་སེ་ལྷུན་པོ། །
སྐྱོ་སྡུག་སྨུག་པའི་གཏིམས་པའི་ངང་ཚུལ་བསམ་ན། །
སྙིང་ལ་རུས་པ་སྐྱེད་པའི་རྐྱེན་དུ་འདུག་གོ །
བརྩེ་མི་ལགས། བརྩེ་བའི་རང་ཉིད་ལགས།
གངས་འོད། མངོན་པ་འོག་མ།
དང་པོ་མཛེས་སྡུག་ལས་ཀྱི་བརྩེ་བ་སྤྱད། །
དེ་ནས་རྨི་ལམ་ལྟ་བུའི་ལས་འཕྲོ་མཐུད། །
འབྲས་མེད་སྙིང་ཆུང་ལག་མཐིལ་ལྷུང་བ་ཡི། །
སྡུག་བསྔལ་ཕུང་པོ་འཁུར་བའི་འདམ་ག་དེ། །
བརྗེད་མེད་རྒྱང་རིང་སེམས་ཀྱི་དྲན་ཤིང་སྟེ། །
བརྩེ་བའི་མི་ལགས་བརྩེ་བའི་རང་ཉིད་ལགས། །
•
ཐག་ཉེ་སྙིང་དཀྱིལ་ཡིད་འོང་གཏམ་གྱི་སྣེ། །
ཐག་རིང་སྐྲ་དཀར་གཉེར་མ་འབབ་དུས་ཀྱང་། །
མི་འགྱུར་མནའ་ཚིག་དམ་བཅའ་བསྲེལ་བ་དག །
ཆག་གྲུམ་ཤོར་བ་སེམས་ལ་གཟན་པ་ཡིས། །
ཞེ་སྨྲེང་སྡུག་གི་གཡང་སར་ལྕེབས་བྱུང་ཨང་། །
བརྩེ་བའི་མི་ལགས་བརྩེ་བའི་རང་ཉིད་ལགས། །
•
འདས་དོན་སྙིང་གི་གའུར་སྦས་པ་དེ། །
མི་རྟག་མཛའ་བས་ངག་ལ་བཀུག་པ་ན། །
དྲོད་མེད་ལུས་སེམས་ལྷགས་པས་བདས་འདྲ་བ། །
སྔས་འགྲམ་མཆི་མ་འཁྱག་པས་གཟིར་བ་འདི། །
སེམས་པས་སེམས་པ་གློད་པའི་གཏམ་རྒྱུད་དོ། །
བརྩེ་བའི་མི་ལགས་བརྩེ་བའི་རང་ཉིད་ལགས། །
ལོ་སར་ལ་ཁ་གཡང་།
གཟི་ནག་པོ། མངོན་པ་འོག་མ།
༡
ཨ་མ་ལགས
ལོ་ན་མཐོན་པོ་ལ་སོན་ཡང
ད་ལྟའི་དུས་བབས་ལྟ་བའི་ལོ་སར་རེ་རེ་ཚེས་ཚེ
ཨ་མ་ནི་ལོ་ན་གཞོན་པར་གྱུར་བའི་སྣང་བ་སྟེར
སྐྲ་ལོ་དཀར་པོར་གྱུར་ན་ཡང
མེ་ཏོག་གི་འཛུམ་ཁ་རྒོད་པའི
ཨ་མ་ལགས་ཀྱི་ཞལ་ཟུང་ནི
ལོ་སར་ཀྱི་དུས་སུ་ཆེས་མཛེས་སྡུག་གི་ལེགས་སྐྱེས་ཤིག་ཡིན་ཆོག
ཨ་ཕ་ལགས
ལྔ་བཅུར་སོན་ན་ཡང
ཕྱག་ཟུང་གིས་རང་ཅག་མ་དོར་བས
ཉིད་ཀྱི་རྒ་བའི་གཉེར་རུས་རེ་རེ་ནས
བདག་གིས་ནམ་ཡང་བརྗེད་མི་ཐུབ་པ་ནི
ཁྱེད་ཀྱིས་ཀུན་ལ་ཡང་ཞུམ་པ་མེད་པའི་དཔའ་ངར་དེ་ཡིན
བྱམས་བརྩེ་རྒྱབ་རི་ལས་བསྟན་པའི་ཨ་ཕ་ལགས
ཁྱེད་ཀྱི་རེ་བ་མང་པོ་ཞིག་བདག་གིས་སྒྲུབ་མ་ནུས་པས
དངོས་ནས་དགོངས་དག་ཞུ་འོས
༢
ཉེ་རིང་ཀུན་དང་ཡིད་རིང་བྲལ་ཏེ
སོ་སོས་བས་མཐའ་རེ་ནས་ལས་དཀལ་གྱི་ལམ་ལ་ཞུག་པས
ཐུག་ཕྲད་ཀྱི་དུས་ཤིག་དཀོན་ན་ཡང
ལོ་སར་ནི རྒྱང་རིང་དུ་གྱེས་པའི
ཉེ་རིང་དག་དང་ལྷན་གཅིག་ཏུ་འདུ་བ་དང
ལོ་གཅིག་གི་སེམས་ངལ་གསོ་བའི་དུས་ཚིག
ཆེས་མཆོག་ཏུ་གྱུར་པ་དེ་གློད་ཆོག
༣
ཡང་ལོ་གཅིག་གི་བང་རུམ་ལས་བརྒལ་བའི
ཧ་ཅང་ཉམས་ཆུང་གི་ང་ཚོས
སྐྱབས་གསུམ་གྱི་ལྷ་ལ་རེ་བཅོལ་རེ་བྱས་ཏེ
གང་ཞིག་ཏུ་བྱ་བ་ལ་ཞུག་རྩིས་ཡོད
སྙིང་བོས་སྟོང་པའི་མི་ཚེ་ཡི་ཉག་ཁ་རེ་རེ་ནི
སུ་ཞིག་ལ་མཚོན་ན་ཡང
ཞེད་སྣང་སློང་བྱེད་ཞིག་དང་དགའ་བ་སློང་བྱེད་ཅིག་ཅི་ལ་མིན
༤
འབྲུག་ལོའི་ང་རང་ནི
འདས་པའི་ལོ་དེའི་ནང་ནས
གཞན་ལ་གློད་ཆོག་ཆོག་གི་བྱ་བཞག་གང་ཡང་མེད་པས་ཡིད་རེ་སྨྲེང
དགའ་ཕྱོགས་དང་བརྩོན་པ་ཆེ་ཆུང་བྱུང་ཚེ
ལོ་ཟླ་ག་ཙམ་བརྒལ་ཡང་རུང
ལག་གཏོང་ཞིག་ལས་ཕ་མ་ལ་གང་ཡང་སྐྱེས་སུ་འབུལ་མ་ནུས
༥
སྤྱི་ལོའི་མགོ་མ་དང་བསྟུན
རང་རང་གི་དགའ་ཕྱོགས་ལ་འབད་འབུང་བྱས་ཏེ
བྱ་བ་མངོན་དོད་དུ་གྱུར་པའི་སྨོན་པ་གྲངས་མེད་ཡོད
རྩོམ་རིག་ལ་དགའ་བ་རྣམས
སྙན་ཚིག་ཆར་བ་འབབ་ཤོག
ཡིད་བརྙན་སྣ་ཚོགས་ཀྱིས་རམ་འདེགས་བྱས་ཏེ
ཀུན་གྱི་སྙན་ལམ་དུ་སྙན་ངག་མོག་པོ་རྡོལ་ཤོག
༦
མདོར་ན
ཅི་བསམ་དོན་འགྲུབ་ཤོག
བཀྲིས་བདེ་ལེགས
སྲས་མོའི་མིག་ཟུང་།
ལྷ་ནག་པོ། ཕར་ཕྱིན་གོང་མ།
ཁྱོད་ཀྱི་མིག་ཟུང་
མེ་ལྕེ་མཆེད་པའི་མདེའུ་ཞིག་
ང་ཡི་གཟུགས་ཕུང་མེ་ལ་སྲེད་ཅིང་
སེམས་པ་བརྟོལ་ནས་ཕྱེད་ཀ་གཉིས་སུ་བགོས་
ཕྱེད་གཅིག་ནས་ངས་ཁྱོད་ལ་གླུ་དབྱངས་ལེན་སྙམ་
ཕྱེད་གཅིག་ནས་ངས་ཁྱོད་དང་འཐབ་མོ་འགྱེད་དྲན་
ཀྱེ ལྷ་མཆོག་ལགས
ངས་གང་ལ་ལག་ཟུང་སྟེར་དགོས་སམ་
༢༥—-༢—-༡༣
ཕེབས་བསུ།
སྨྲ་སྲས། དབུ་མ་བར་པ།
ཧི་མ་ལའི་རྩེ་མོ་ནས།
གཞིས་ཁྱིམ་གྱི་ཕྱོགས་སུ་གཟིགས་དང་།
ལྷ་ཆེན་པོ།
ཕྱི་སྣོད་རབ་དཀར་གྱིས་སྐོར་བའི་ཁོང་གསེང་དེ་ནས།
མཐུན་སྒྲིལ་ལག་བསྟར་གྱི་སྙིང་སྟོབས་དང་ཡིད་ཆེས་ཀྱིས།
ཡུན་རིང་གི་ཞལ་བཟང་སྨོན་ཕྲེང་སྟོང་གིས་བསུས་ཡོད།
བྱང་ལྡིང་གི་ལྷ་ཆེན་ལགས།
ཕུ་ནུ་དང་ཨ་མའི་རེ་འདུན་བསྣམ་སྟེ།
རིང་ནས་མ་བསྐྱོད། ཚུལ་ལ་བྱོན་དང་།
ཡུལ་འདིའི་སྤྱོད་ཚུལ་གྱི་སྣང་བརྙན་ཀློང་དུ།
སྐྱེ་འགྲོའི་སྙིང་རྗེ་དང་བསོད་ནམས་ཀྱི་ལས་བཟང་ཁེངས་ཡོད།
འཛམ་གླིང་གི་ཞིང་ཁམས་ཐོགས་སའི་གནས་མཆོག་འདི་ཡིན།
སྤྲིན་དཀར་གྱི་བང་རིམ་ནས།
མཐོ་སྒང་གི་ལྟད་མོ་ལ་གཟིགས་དང་།
ལྷ་ཆེན་པོ།
མཐར་སྐོར་ཆོལ་གསུམ་གྱིས་འཁྱུད་བའི་ཕོ་བྲང་དེ་ནས།
དད་འདུན་བཙན་ངར་གྱི་རང་དབང་དང་ཞི་བདེ་ཡིས།
ཞུ་ཕེབས་ཀྱི་སྔོན་གྲལ་བློ་དང་སྤོབས་པས་བཤམས་ཡོད།
འཕགས་ཡུལ་གྱི་ལྷ་ཆེན་ལགས།
རེ་འདུན་དང་ཐུགས་འཁྲེང་ཁྲོད་ནས།
རྒྱང་ནས་མ་ལྡིང། ཚུལ་ལ་ཕེབས་དང་།
ཡུལ་འདིའི་བགས་ཕེབས་ཀྱི་འཚོ་བའི་ཀློང་དུ།
ཆོག་ཤེས་གཅེས་འཛིན་གྱི་ཤེས་རབ་དང་ལྷིང་འཇགས་ཤོང་ཡོད།
འཛམ་གླིང་གི་ཞིང་ཁམས་ཐོགས་སའི་གནས་མཆོག་འདི་ཡིན།
༢༠༢༥/༡/༡༩ཉིན།
རྩོམ་སྒྲིག་པ། མྱི་གསར་བ།
རྨི་ལམ་གྱི་ཡུལ་ལྗོངས།
མྱི་གསར་བ། འདུལ་བ་གོང་མ།
ལྗང་མདོག་རྩི་ཤིང་ཡལ་ག་གཡོ་བ་ལ།།
སྟོན་རླུང་རྒྱུ་བའི་ངང་ཚུལ་བསིལ་བ་ལ།།
རྒྱ་སེ་མེ་ཏོག་ཚོན་མདངས་བཀྲ་བ་ལ།།
རང་བྱུང་བཀོད་པ་ལྷུན་ཆགས་མཛེས་པ་ལ།།
རྐས་ཐེམ་སྟོང་ཕྲག་རྒྱང་ཐག་རིང་བ་ལ།།
ཁྱེད་རང་ལོག་པའི་ལམ་ཡང་རིང་བ་ལ།།
འཁོར་བའི་མི་ཚོགས་འགྲུལ་བཞུད་མང་བ་ལ།།
དུས་ཚོད་འཁོར་ལོའི་བཞུར་རྒྱུན་མྱུར་བ་ལ།།
རྒྱང་རིང་འཕྲིན་ཡིག་ཡིད་འགུལ་ཐེབས་པ་ལ།།
འཁྲུལ་སྣང་གཏམ་རྒྱུད་དེ་ཡང་སྙན་པ་ལ།།
རྒས་པ་གསལ་སྒྲོན་དད་སེམས་ཆེ་བ་ལ།།
བྱིས་པ་འབྲུག་ལྷ་བྲ་ཆལ་ཆེ་བ་ལ།།
ངོ་མཚར་འཁོར་བའི་རྩེད་མོ་མཚར་བ་ལ།།
ཁྱེད་རང་དར་མ་ཡིན་ནམ་རྒན་པ་ཡིན།།
ཁྱེད་རང་མཁས་པ་ཡིན་ནམ་བླུན་པོ་ཡིན།།
རྫོགས་མེད་མི་ཚེའི་འགྲུལ་བཞུད་དེ་ག་ཡང་།།
ཁྱེད་རང་དགའ་བ་འཕེལ་བའི་ལེགས་སྐྱེས་དང་།།
བག་ཕེབས་གུ་ཡངས་འཚོ་བའི་དགའ་སྟོན་ལགས།།
༢༠༢༤ ༡༡ ༢༧
རྩོམ་སྒྲིག་པ། མྱི་གསར་བ།
མཐོང་གྲོལ་དྲ་རྩོམ་དག་རྩོམ་བདག་དང་དྲ་བདག་གིས་ཆོག་མཆན་མེད་པར་རང་དགར་མི་འཁྱེར་བར་མཁྱེན།
 |
|
Signature is customized by Netease
