རྫོང་སར་རྩོམ་རིག རང་མོས་སྙན་ངག ༦

རྫོང་སར་རྩོམ་རིག  རང་མོས་སྙན་ངག ༦

གྲོལ།  ཆར་ཞོད།  གཟི་ནག་པོ།  བརྩོན་འགྲུས།  དཔལ་འབར།  རི་སྤྱང་། 
            ཁམས་འོད་གསལ།  རྣལ།  གངས་འོད།  རབ་རྡོར།  གྱམ་སྙིང་ལྕགས། 
                    རྐྱང་ཉུལ་གདོང་ནག  ཕུང་གསུམ་པ།  ཞོགས་སད།  མྱི་གསར་བ།

མི་ལོ་བཅུ་གསུམ།
             རི་སྤྱང་།  ཕར་ཕྱིན་གོང་མ།
 

ངས་མེ་ཏོག་ཅིག་ལ་རེ་སྒུག་བྱས་ནས
མི་ལོ་བཅུ་གསུམ་འདས
འཛུམ་མདངས་ཤིག་གེར་གཞི་ནས་སྨིན་བྱུང་
མི་ལོ་བཅུ་གསུམ་ཕར་རྒྱབ་ཀྱི་སྐྱོ་གདུང་དང་མིག་ཆུ
ཁྱོད་ཀྱིས་རྟོགས་ཐབས་བྲལ ངས་ཀྱང་མི་ཤེས
ངེད་གཉིས་ཀྱི་བར་དུ་ཡོལ་བ་ཞིག་གིས་ཆོད
ཉིན་མོ་ཁྱོད་ཀྱིས་མཐོང་ཐུབ
མཚན་མོ་ང་ཡིས་མཐོང་ཐུབ
ཉིན་མཚན་གཉིས་ཀྱི་བར་ཐག་ཕྱེ་འདུག

མི་ལོ་བཅུ་གསུམ་འཇའ་ལྟར་ཡལ་རྗེས
ང་རང་འཆི་བའི་དག་ཞིང་ལ་འགྲོ་ངེས
ཚེ་མཇུག་གི་ཕ་མཐའ་བརྒལ་རན
མི་ལོ་བཅུ་གསུམ་གསལ་བོར་
ངའི་དུར་བྱང་ངོས་སུ་ཁོད་ཅིག
དེ་ནི་ངའི་ཁ་དོག་ཡིན
དེ་ནི་ངའི་གཟུགས་སྒྲ་དྲི་རོ་རེག་བྱའོ། །
དེ་ནི་ཁྱོད་ལ་བཞག་པའི་དམ་ཚིག་དང་ཁྲེལ་གཞུང་གི་ལེགས་སྐྱེས་སོ། །

ཨ་མ་ནི་ལྷ་ཞིག་ཡིན་ནམ།  
         མངོན་པ་འོག་མ། རབ་བརྟན་རྡོ་རྗེ་ཚེ་འཕེལ།  
 
ངས་སྟོང་བསམ་རེ་བརྒྱབས་ཚེ། 
ཡང་ན། དོན་སྙིང་ལྡན་པའི་འདང་རེ་བརྒྱབས་ཚེ། 
ཨ་མ་ནི་ལྷ་ཞིག་ཡིན་ནམ་སྙམ། 
 
པྲ་ཚགས་ཅན་གྱི་ཕྲུ་གུ་དགུ། 
གཅིག་རྗེས་གཉིས་མཐུད་ཀྱི་ཚུལ་དུ་སྐྱེས། 
ཅི་ཡང་མི་ཤེས་པའི་བྱིས་པ་དགུ། 
ཤེས་ཡོན་དང་བྱམས་བརྩེ་ཅན་དུ་བསྒྱུར། 
 
ཡང་ན།  ཅི་ཞིག་བཟའ་དགོས་མིན། 
གང་དུ་འགྲོ་དགོས་མིན། ག་རེ་བྱ་དགོས་མིན། 
ཐ་ན་གཅིན་སྐྱག་དང་མར་རྩམ། 
ཤན་མི་འབྱེད་པའི་བླུན་པོ་དགུ།
སྤང་བླང་གི་གདམས་པ་བསྩལ། 
 
ཡང་ན། ཅི་ཞིག་འཆད་དགོས་མིན།
གང་ཞིག་སློབ་དགོས་མིན། ག་རེ་ཉན་དགོས་མིན། 
ཐ་ན་ལེགས་བཤད་དང་ཉེས་བཤད། 
ཁྱད་མི་འབྱེད་པའི་ལྐུགས་པ་དགུ།  
བླང་དོར་གྱི་མན་ངག་གནང་།  
 
སྣབས་ལུད་མི་གཙང་བ་ཤེས་ཀྱང་། 
གཅིན་སྐྱག་སུངས་དྲི་ཅན་མཁྱེན་རུང་། 
བྱམས་པའམ་བརྩེ་བ་ལས། 
ཕྲུ་གུ་དགུ་པོ་དེའི་སྣབས་ལུད་དམ། 
གཅིན་སྐྱག་ལ་བདུད་རྩི་རུ་བསྒོམས་ནས། 
ཁ་ཡིས་འཇིབ་ཅིང་། ལག་པས་ཕྱི་བདར་གནང་། 
 
དོན་ངོ་མར་ཨ་མ་ནི་སུ་ཞིག་རེད། 
ཨ་མ་ནི་ལྷ་ལས་ལྷག་པའི་ལྷ་ཞིག་རེད། 
 
ལྷ་དེ་ལ་རྫུ་འཕྲུལ་མེད།
ལྷ་དེ་ལ་མངོན་ཤེས་མེད། 
ལྷ་དེ་ལ་ཕྱག་སྟོང་སྤྱན་སྟོང་ཡོད།
ལྷ་དེ་ལ་བྱམས་དང་སྙིང་རྗེ་ཡོད། 
 
དོན་ངོ་མར་ལྷ་ནི་ལྷ་མིན་ལ།
 དོན་ངོ་མའི་ལྷ་ཞེས་པ་ཞིག་ཡོད་ཚེ།  
ཨ་མ་ནི་ལྷ་དེ་ཡིན་ངེས། 
     བོད་རྒྱལ་ལོ༢༡༤༩ལོའི་༤;༢༥ལ།  

མྱ་ངན།
         རྣལ། ཕར་ཕྱིན་བར་མ།  

བས་མཐའི་ཡུལ་ནས་བསམ་གཞིགས་བྱེད་དྲག་པས།
གདོང་པར་མེ་ཏོག་གི་དྲི་ཞིམ་བརླན་གྱིན་ཡོད་ནའང་།
སྐྱིད་སྡུག་གི་ལོ་ཟླའང་ཚེས་གཅིག་གི་ཟླ་བ་བཞིན་དུ་མངོན།

ཧ་ཅང་གཉོམ་ཆུང་བའི་མིག་ཟུང་གིས།
སྐྱོ་སྐྱོའི་མིང་ལས་རྙེད་པའི་རེ་བ་ཆུང་ངུ་དེ་རུམ་ནའང་།
ག་ལེར་ག་ལེར་གཟིམས་བྱུང་།

རྨི་ལམ་ལ་བཅོལ་བའི་རྟོག་སྒྲུང་མཐུག་པོ་དེ།
རེ་ཞིག་སྒལ་གཞུང་ནས་དལ་གྱིས་ཕབ་དགོས་བྱུང་བས།
མཆོད་མེ་ལ་སྒྲོན་པའི་སྨོན་ལམ་སྒུག་དགོས་བྱུང་།
༢༠༢༣  རྫོང་སར།

པོ་ཏ་ལ།
      ཞོགས་སད། ཤེར་ཕྱིནའོག་མ།
 
འོད་སྟོང་ལྡན་པའི་རླབས་ཀྱི་རི་བོ
བརྗིད་ཉམས་ཀྱིས་གང་བའི་ས་གཞི་གཙང་མ
གཡོ་བ་མེད་པའི་ཁྱེད་ཀྱི་གཟུགས་བརྙན་ལ་གཟི་འོད་འཕྲོལ་ཞིང
མཁའ་དབྱིངས་སུ་སྙིང་རྗེ་ཆེན་པོའི་རང་གཞི་ལས་མེ་ཏོག་གི་ཆར་འབབ

མཚེ་བ་མེད་པའི་ཞི་བདེའི་ཕོ་ཉ་བཞིན
ཁྱེད་ཀྱི་སྐུ་གཟུགས་ལ་གཅེས་སྤྱོང་བྱ་ཞིང
ཅི་གསུང་གི་བཀའ་སྒྲུབ་པའི་སྟོབས་ལྡན་གྱི་སྒོ་བ་དྲུག
བསམ་པའི་འདོད་དོན་འགྲུབ་པའི་སྤི་ཏྲ་སྦ་ཏྲ་གཉིས
ཁྱོད་ལ་མངའ་ཁོང་དང་དབང་འབྱོར་ཆེ་ཞིང
ཕུགས་བསམ་དང་དམིགས་ཡུལ་རིང་བའི་རླབས་ཆེན་གྱི་པོ་ཏ་ལ

མེས་པོའི་ཤ་ཁྲག་གིས་བཟོས་པའི་གངས་ཅན་པའི་ཁྱིམ་མི་བསྡོད་གནས་ཤིག

	མཐོང་གྲོལ།
邮箱：tongdrol@163.com

Signature is customized by Netease

གོང་མ།

རྫོང་སར་རྩོམ་རིག སྒྲུང་ཐུང་། ༡
རྫོང་སར་རྩོམ་པ་པོ་མཐུན་ཚོགས།